நாளை திருவண்ணாமலை தீபம்; மலையேற்றப்பட்ட கொப்பரை - முன்னேற்பாடுகள் துரிதம்

திருவண்ணாமலை தீபத்திருவிழாவின் முக்கிய நிகழ்வான `மகா தீபம்’ நாளை மாலை ஏற்றப்படுகிறது.

இதையொட்டி, நாளை காலை 4 மணிக்கு அண்ணாமலையார் திருக்கோயிலில் சுவாமி சன்னதி எதிரே `ஏகன் அநேகனாகி அநேகன் ஏகனாகுதல்’ எனும் தத்துவத்தை உணர்த்தும் வகையில் `பரணி தீபம்’ ஏற்றப்படுகிறது. அதைத்தொடர்ந்து, மாலை 6 மணிக்கு 2,668 அடி உயரம் கொண்ட கோயில் மலை மீது மகா தீபம் ஏற்றப்படுகிறது. இதற்காக தயார் செய்யப்பட்டுள்ள கொப்பரைக்கு இன்று அதிகாலை அண்ணாமலையார் முன்பு சிறப்புப் பூஜைகள் செய்யப்பட்டன. அதன் பிறகு 40 பேர் கொண்ட குழுவினர் தீப மலை உச்சிக்கு கொப்பரையைத் தூக்கிச் சென்றனர்.

கொட்டும் மழையிலும் நனைந்தபடி அவர்கள் `அண்ணாமலையாருக்கு அரோகரா’ என்று முழங்கிக்கொண்டே மலை உச்சியை அடைந்தனர். மகா தீபம் ஏற்ற 1,200 மீட்டர் துணியும், 4,500 கிலோ நெய்யும் தயார் நிலையில் இருக்கிறது. 40 லட்சத்துக்கும் அதிகமான பக்தர்கள் மகா தீபத்தை வணங்குவதற்காக வருவார்கள் என மாவட்ட நிர்வாகத்தால் எதிர்பார்க்கப்படுகிறது.

எனவே, பக்தர்களின் பாதுகாப்பிற்காக 14,000 போலீஸாரும் குவிக்கப்பட்டிருக்கின்றனர். 25 தற்காலிக பேருந்து நிலையங்கள், 116 கார் பார்க்கிங் மையங்கள், 95 மருத்துவ முகாம்களும் அமைக்கப்பட்டுள்ளன. 700 கண்காணிப்புக் கேமராக்களும் பொருத்தப்பட்டுள்ளன.

கிரிவல பக்தர்கள் இடையூறுகள் இல்லாமல் செல்வதற்காக 500 மீட்டருக்கு 6 காவலர்கள் நிறுத்தப்பட்டிருக்கின்றனர். நெடுஞ்சாலைத்துறை சார்பிலும் கிரிவல பக்தர்களின் தாகம் தணிக்க சுத்திகரிக்கப்பட்ட குடிநீர் நிலையங்கள் ஏற்படுத்தப்பட்டுள்ளன. மாநகராட்சி நிர்வாகம் மற்றும் ஊரக வளர்ச்சித்துறை சார்பிலும் தற்காலிக பேருந்து நிலையங்கள், கிரிவலப் பாதை உள்ளிட்ட இடங்களில் தண்ணீர் மற்றும் கழிப்பறை வசதிகள் செய்யப்பட்டுள்ளன.

தங்கும் விடுதிகள் முழுவதும் பக்தர்களின் கூட்டத்தால் நிரம்பியிருக்கிறது. தமிழகம் முழுவதும் இருந்து 3,400 சிறப்புப் பேருந்துகளும், 20 ரயில்களும் திருவண்ணாமலைக்கு இயக்கப்படுகின்றன. மேலும், வெளி மாவட்டங்களில் இருந்து வழக்கமாக திருவண்ணாமலை வழியாக வேறு மாவட்டங்களுக்குச் செல்லக்கூடிய கனரக மற்றும் இலகு ரக வாகனங்கள் இன்று முதல் வரும் 15-ம் தேதி மாலை 6 மணி வரை திருவண்ணாமலை வழியாகச் செல்ல தடை விதிக்கப்பட்டுள்ளது. அதேபோல், நாளை மாலை ஏற்றப்படும் மகா தீபம் 11 நாள்களுக்குப் பிரகாசிக்கவிருக்கிறது.