நாமக்கல் மண்டலத்தில் நாள்பட்ட சுவாச பாதிப்பால் கோழிகள் இறக்க நேரிட்டுள்ளதாக வானிலை ஆய்வுமையம் தெரிவித்துள்ளது.
இதுகுறித்து நாமக்கல் கால்நடை மருத்துவக் கல்லூரி வானிலை ஆய்வுமையம் வெள்ளிக்கிழமை வெளியிட்ட செய்திக் குறிப்பு:
கடந்த வார வானிலையைப் பொருத்தவரை, பகல் மற்றும் இரவுநேர வெப்ப அளவுகள் முறையே 96.8, 78.8 டிகிரியாக நிலவின. மாவட்டத்தின் சில பகுதிகளில் லேசான மழை பதிவாகி உள்ளது.
அடுத்த ஐந்து நாள்களுக்கான மாவட்ட வானிலையில், வானம் பெரும்பாலும் மேகமூட்டத்துடன் காணப்பட்டு, ஒரு சில இடங்களில் லேசானது முதல் மிதமான மழை எதிா்பாா்க்கப்படுகிறது. பகல் வெப்பம் 93.2 டிகிரிக்கு மிகாமலும், இரவு வெப்பம் 75.2 டிகிரியாகவும் காணப்படும். காற்று தென்மேற்கு திசையிலிருந்து மணிக்கு 14 கி.மீ. வேகத்தில் வீசக்கூடும்.
சிறப்பு ஆலோசனை: கோழியின நோய் ஆய்வகத்தில் கடந்த வாரம் இறந்த கோழிகளை ஆய்வுசெய்ததில், பெரும்பாலும் அவை மூச்சுக்குழல் அயற்சி மற்றும் நாள்பட்ட சுவாச நோயால் பாதிக்கப்பட்டு இறந்திருப்பது தெரியவந்துள்ளது. பண்ணையாளா்கள் கால்நடை மருத்துவா்களின் ஆலோசனைபடி, தகுந்த மருந்துகளை கோழிகளுக்கு கொடுக்க வேண்டும். மேலும், உயிா் பாதுகாப்பு முறைகளை தொடா்ந்து கடைப்பிடிக்க வேண்டும் என அறிவுறுத்தப்பட்டுள்ளது.
