நிதிப் பற்றாக்குறை இருந்தாலும் மாணவா்களுக்கு வசதிகள்: அமைச்சா் காந்தி

அரக்கோணம்: அரசிடம் நிதிப் பற்றாகுறை இருந்தாலும் சமூகபங்களிப்பு, நமக்கு நாமே போன்ற திட்டங்கள் மூலம் மூலம் மாணவா்களின் வசதிகள் உடனுக்குடன் நிறைவேற்றப்படுகின்றன என கைத்தறி மற்றும் துணிநூல் துறை அமைச்சா் ஆா்.காந்தி பேசினாா்.

மாநிலங்களவை திமுக உறுப்பினா் என்.ஆா்.இளங்கோவின் தொகுதி மேம்பாட்டு நிதி ரூ1.19 கோடியில் சோளிங்கா், எத்திராஜம்மாள் முதலியாண்டாா் அரசு மகளிா் மேல்நிலைப்பள்ளியில் 6 வகுப்பறைகள் கொண்ட புதிய கட்டடம் கட்டப்பட்டது.

புதிய கட்டடத்தை பள்ளிக் கல்வித்துறை அமைச்சா் அன்பில் மகேஸ்பொய்யாமொழி, கைத்தறி மற்றும் துணிநூல் துறை அமைச்சா் ஆா்.காந்தி திறந்து வைத்தனா். விழாவில் அமைச்சா் ஆா்.காந்தி பேசியது:

ஆட்சிப்பொறுப்பேற்றது முதல் முதல்வா் ஸ்டாலின் கல்வி, சுகாதாரதுக்கும் அதிகளவில் முக்கியத்துவம் அளித்து பல்வேறு திட்டங்களை செயல்படுத்தி வருகிறாா். அரசிடம் நிதிப்பற்றாக்குறை இருந்தாலும் சமூக பங்களிப்பு, நமக்கு நாமே திட்டங்களால் மாணவா்களின் அடிப்படை வசதிகள் உடனுக்குடன் நிறைவேற்றப்படுகின்றன. நன்றாக படிக்கும் மாணவா்களுக்கென அரசு மாதிரி பள்ளிகள் செயல்பட்டு வருகின்றன. அதில் மாணவா்களுக்கு அனைத்தும் இலவசமாக வழங்கப்பட்டு அவா்களின் தனித்திறமைகள் வளா்க்கப்பட்டு வருகின்றன என்றாா் அமைச்சா் ஆா்.காந்தி.

பள்ளிக்கல்வித்துறை அமைச்சா் அன்பில் மகேஸ் பேசியது:

நாம் படித்த படிப்பானது கடைசி வரை நம்முடன் வரும். மற்றவை தொடா்ந்து வராது. ஆகவே மாணவ, மாணவியா் படிக்கும் வயதில் படிப்பில் மட்டும் கவனம் செலுத்தி படிக்க வேண்டும். பெற்றோா்கள் உங்களின் பிள்ளைகளை மற்ற பிள்ளைகளோடு ஒப்பிட்டு பாா்க்காதீா்கள். ஒவ்வொரு மாணவரிடமும், மாணவியிடமும் தனித்தனி திறமைகள் இருக்கும். அதனை கண்டறிந்து ஊக்கப்படுத்த வேண்டியது பெற்றோா்களின் கடமையாகும் என்றாா்.

ராணிப்பேட்டை ஆட்சியா் ஜெ.யு. சந்திரகலா, மாநிலங்களவை உறுப்பினா் என்.ஆா்.இளங்கோ, சோளிங்கா் எம்எல்ஏ ஏ.எம்.முனிரத்தினம், முதன்மைக் கல்வி அலுவலா் சரஸ்வதி, பெற்றோா் ஆசிரியா் கழகத்தலைவா் கோபிகிருஷ்ணா, நகா்மன்ற உறுப்பினா் சுசீலா மூா்த்தி, பள்ளி மேலாண்மை குழுத்தலைவா் லோகநாயகி பிரதாபன், தலைமை ஆசிரியா் மணிவண்ணன் உள்ளிட்ட பலா் பங்கேற்றனா்.