கடலூா் மாவட்டம், நடுவீரப்பட்டு அருகே தொழிற்சாலை அமைப்பதற்காக நிலத்தை கையகப்படுத்துவதற்கு எதிா்ப்பு தெரிவித்து கிராம மக்கள் சனிக்கிழமை போராட்டத்தில் ஈடுபட்டனா்.
கடலூா் ஒன்றியம், வெள்ளக்கரை ஊராட்சிக்குள்பட்ட மலையடிக்குப்பம், கொடுக்கன்பாளையம், பெத்தாங்குப்பம் கிராமங்களில் சுமாா் 500-க்கும் மேற்பட்ட குடும்பங்கள் வசித்து வருகின்றன.
இந்தப் பகுதியில் தொழிற்சாலை அமைப்பதற்காக கடந்த டிச.19-ஆம்தேதி அரசு இடத்தை ஆக்கிரமிப்பு செய்துள்ளதாகவும், 15 நாள்களுக்குள் ஆக்கிரமிப்புகளை அகற்ற வேண்டும் என்றும் இந்தப் பகுதி மக்களுக்கு வருவாய்த்துறையினா் நோட்டீஸ் அளித்தனராம்.
இதற்கு எதிா்ப்பு தெரிவித்து, பொதுமக்கள் சனிக்கிழமை காலை மலையடிக்குப்பம் கிராமத்தில் சமையல் பாத்திரங்களுடன் போராட்டத்தில் ஈடுபட்டனா்.
இதுகுறித்து, அவா்கள் கூறுகையில், நாங்கள் இந்தப் பகுதியில் 100 ஆண்டுகளுக்கு மேலாக வசித்து வருகிறோம். பட்டா வழங்கக்கோரி அளித்த மனு பரிசீலனையில் உள்ளது. தற்போது, சுமாா் 150 பேரின் வீடுகள் மற்றும் முந்திரி பயிா்கள் அகற்றப்படும் என்று அதிகாரிகள் தெரிவிக்கின்றனா்.
இது தொடா்பாக மாவட்ட ஆட்சியரை சந்தித்து முறையிட உள்ளோம். எங்கள் மீதான நடவடிக்கையை அரசு கைவிட வேண்டும். அனைவருக்கும் உரிய இலவச பட்டா வழங்க வேண்டும் என்றனா்.
போராட்டத்தில் ஈடுபட்ட பொதுமக்களிடம் பாமக மாவட்டச் செயலா் சண்.முத்துகிருஷ்ணன், மாவட்டத் தலைவா் தட்சணாமூா்த்தி ஆகியோா் சந்தித்து ஆறுதல் கூறியதுடன், மக்களின் வாழ்விடங்களை அப்புறப்படுத்த நினைத்தால் மிகப்பெரிய போராட்டத்தை முன்னெடுப்போம் என்றனா்.
