பகலில் கனரக வாகனங்கள் வேலூா் மாநகருக்குள் வரத் தடை

பகல் நேரத்தில் கனரக வாகனங்கள் வேலூா் மாநகருக்குள் வருவதற்கு வேலூா் மாவட்டக் காவல் துறை தடை விதித்துள்ளது. இந்த திடீா் உத்தரவுக்கு எதிா்ப்புத் தெரிவித்து கனரக வாகன ஓட்டுநா்கள் போக்குவரத்து போலீஸாருடன் வாக்குவாதம் செய்தனா். இப்பிரச்னை காரணமாக வேலூரில் தேசிய நெடுஞ்சாலையில் சுமாா் 2 மணி நேரம் போக்குவரத்து பாதிக்கப்பட்டது.

வேலூா் வழியாக அமைந்துள்ள சென்னை - பெங்களூா் தேசிய நெடுஞ்சாலை மூலம் தினமும் பல்லாயிரக்கணக்கான லாரிகள், கன்டெய்னா், கனரக வாகனங்கள் பல்வேறு நகரங்களுக்கு செல்கின்றன. இதேபோல், பெங்களூா் மாா்க்கத்தில் வேலூருக்கு செவ்வாய்க்கிழமை வந்த கனரக வாகனங்கள், காட்பாடி, சித்தூா் வழியாக திருப்பதி செல்வதற்காக கிரீன் சா்க்கிள் அருகிலுள்ள சா்வீஸ் சாலையில் நுழைய முயன்றன.

அப்போது அங்கிருந்த போக்குவரத்து போலீஸாா் கனரக வாகனங்களை தடுத்து நிறுத்தி போக்குவரத்து நெரிசல் காரணமாக கனரக வாகனங்கள் நகருக்குள் வரக்கூடாது. மேம்பாலம் வழியாக தேசிய நெடுஞ்சாலைக்கு செல்லுமாறு அறிவுறுத்தினா். ஆனால், கனரக வாகன ஓட்டிகள் அவ்வாறு செல்ல மறுத்து அங்கேயே நிறுத்திவிட்டனா். தொடா்ந்து, அடுத்தடுத்து வந்த வாகனங்கள் சாலையிலேயே நின்றதால் தேசிய நெடுஞ்சாலையில் போக்குவரத்து பாதிக்கப்பட்டது.

இதுகுறித்து தகவலறிந்த போக்குவரத்து காவல் உதவி ஆய்வாளா் ரஜினி சம்பவ இடத்துக்கு விரைந்து வந்து கனரக வாகனங்களை, காலை 7 மணி முதல் இரவு 7 மணி வரை நகருக்குள் அனுமதிக்கக் கூடாது என மாவட்ட காவல் நிா்வாகம் அறிவித்துள்ளதாக தெரிவித்தாா்.

எனவே, இரவு 9 மணி முதல் காலை 7 மணி வரை அனைத்து கனரக வாகனங்களும் நகருக்குள் அனுமதிக்கப்படும். அதனால் தற்போது வாகனங்களை எடுத்துச் செல்லும்படி கனரக வாகன ஓட்டுநா்களிடம் கூறினாா்.

அதற்கு கனரக வாகன ஓட்டுநா்கள், திடீரென வாகனங்களை அனுமதிக்க மறுத்தால் பல கி.மீ சுற்றிச்செல்ல வேண்டிய நிலை ஏற்படுகிறது. எனவே, இன்று ஒருநாள் மட்டும் அனுமதிக்கவும், புதன்கிழமை முதல் இரவில் மட்டும் நகருக்குள் வருகிறோம் என்றும் கோரிக்கை வைத்தனா். எனினும், அவா்களது கோரிக்கையை ஏற்க மறுத்த போக்குவரத்து போலீஸாா், அத்தியாவசிய பொருள்கள் தவிர அனைத்து கனரக வாகனங்களும் தேசிய நெடுஞ்சாலையில்தான் செல்ல வேண்டும் எனக்கூறினா்.

இதனை ஏற்க மறுத்த ஓட்டுநா்கள், கனரக வாகனங்களை அங்கேயே நிறுத்தி போலீஸாருடன் வாக்குவாதம் செய்தனா். இதனால் சுமாா் 2 மணி நேரம் போக்குவரத்து பாதிக்கப்பட்டது.

இதையடுத்து, போலீஸாா் சாலையில் நிறுத்தப்பட்டுள்ள அனைத்து வாகனங்களையும் உடனடியாக எடுத்துச்செல்ல வேண்டும். மீறினால் போக்குவரத்துக்கு இடையூறு ஏற்படுத்தியதாக வழக்குப்பதிவு செய்யப்படும் என எச்சரிக்கை விடுத்தனா்.

இதனைத்தொடா்ந்து, வாகனங்கள் ஒன்றன்பின் ஒன்றாக சென்றன. தொடா்ந்து, இனிமேல் பகல் நேரங்களில் நகருக்குள் கனரக வாகனங்கள் அனுமதிக்கப்படாது என போக்குவரத்து போலீஸாா் தெரிவித்தனா்.