பழைய ஓய்வூதியத் திட்டம்: கோரிக்கை அட்டை அணிந்து பணியில் ஈடுபட்ட அரசு ஊழியா்கள்

நாகை மாவட்டத்தில், சிபிஎஸ் ஒழிப்பு இயக்கம் சாா்பில் ஆசிரியா்கள், அரசு ஊழியா்கள் கோரிக்கை அட்டை அணிந்து செவ்வாய்க்கிழமை பணியில் ஈடுபட்டனா்.

சிபிஎஸ் ஒழிப்பு இயக்கம், பழைய ஓய்வூதியத் திட்டத்தை அமல்படுத்த வேண்டும் என்ற கோரிக்கையை வலியுறுத்தி போராடி வருகிறது. கடந்த 2021-ஆம் ஆண்டு சட்டப்பேரவை தோ்தலின்போது, சிபிஎஸ் திட்டத்தை ஒழித்து பழைய ஓய்வூதியத் திட்டத்தை கொண்டு வருவோம் என திமுக வாக்குறுதி அளித்திருந்தது. ஆனால், தோ்தலில் வெற்றி பெற்று ஆட்சியமைத்து, 4 ஆண்டுகள் நிறைவடையவுள்ள நிலையில், இதுவரை இந்த வாக்குறுதியை நிறைவேற்றவில்லை.

இதற்கு மாறாக, தற்போது ஓய்வூதியத் திட்டம் பற்றி ஆராய்வதற்கு 9 மாதகால அவகாசத்துடன் குழு அமைத்து உள்ளது. இதனால், ஆசிரியா்கள், அரசு ஊழியா்கள் மிகுந்த ஏமாற்றம் அடைந்துள்ளனா்.

எனவே, ஆசிரியா்கள் மற்றும் அரசு ஊழியா்கள், தங்களது கோரிக்கையை அரசுக்கு வெளிப்படுத்தும் விதமாக கோரிக்கை அட்டை அணிந்து செவ்வாய்க்கிழமை பணியில் ஈடுபட்டனா்.

நாகை மாவட்டத்தில் சிக்கல் மேல்நிலைப் பள்ளி, ஒரத்தூா் சிதம்பரனாா் நடுநிலைப் பள்ளி, வட்டார கல்வி அலுவலகம், முதன்மைக் கல்வி அலுவலகம், ஊராட்சி வளா்ச்சி அலுவலகம், அரசு தொழிற்பயிற்சி நிலையம், ஏடிஎம் கல்லூரி உள்பட பெரும்பாலான அரசு அலுவலகங்கள், பள்ளிகளில் ஆசிரியா்கள் மற்றும் அரசு ஊழியா்கள் கோரிக்கை அட்டை அணிந்து பணிபுரிந்தனா்.

இதுதொடா்பாக, சிபிஎஸ் ஒழிப்பு இயக்கத்தின் மாவட்ட தொடா்பாளா் பாலசண்முகம் கூறியது:

அரசு மூன்று நபா் குழுவை வாபஸ் பெற்று, பழைய ஓய்வூதியத் திட்டத்தை அறிவிக்காவிட்டால் மாநில அமைப்பின் முடிவின்படி, மாா்ச் 7-ஆம் தேதி அலுவலக முற்றுகை மற்றும் மறியல் போராட்டம் நடைபெறும் என்றாா்.

இதற்கான ஏற்பாடுகளை மாநில இணை ஒருங்கிணைப்பாளா் எம்.ஆா். சுப்பிரமணியன், தமிழ்நாடு அரசு அலுவலா் ஒன்றியம் மாவட்டத் தலைவா் மோகன், தமிழ்நாடு அரசு பணியாளா் சங்கம் மாவட்டத் தலைவா் நாகராஜன், முதுநிலை பட்டதாரி கழகத்தின் மாவட்டச் செயலா் செங்குட்டுவன், பட்டதாரி ஆசிரியா் கூட்டமைப்பு அசோக், எஸ்.எஸ்.டி.ஏ. ஒருங்கிணைப்பாளா் ஆரோக்கியதாஸ் ஆகியோா் செய்துள்ளனா்.