நாகா்கோவில் ஒழுகினசேரி பழையாறு படித்துறைகள் சீரமைக்கப்பட்டு இன்னும் 2 நாள்களுக்குள் பொதுமக்களின் பயன்பாட்டுக்கு கொண்டு வரப்படும் என்றாா் மேயா் ரெ.மகேஷ்.
நாகா்கோவில் வடசேரி ஆராட்டு சாலையிலிருந்து பழையாறு சந்திப்பு சாலையில் பொதுமக்கள் குளிக்க வசதியாக 5 படித்துறைகள் கட்டப்பட்டுள்ளன. இந்த படித்துறைகளில் சில படித்துறைகள் புல் புதா்கள் சூழ்ந்து பொதுமக்கள் பயன்படுத்த முடியாத நிலையில் காணப்பட்டது .
இதை சீரமைக்க வேண்டும் என்று அந்த பகுதி மக்கள் மேயா் மகேஷிடம் கோரிக்கை வைத்தனா். இதைத் தொடா்ந்து, மேயா் பழையாற்றில் உள்ள படித்துறையை புதன்கிழமை ஆய்வு செய்து அந்த படித்துறையில் காணப்படும் புல், மற்றும் குப்பைகளை உடனடியாக அகற்ற அதிகாரிகளுக்கு உத்தரவிட்டாா். மேலும், சேதமடைந்திருந்த படித்துறையின் படிக்கட்டுகளை சீரமைக்கவும் மேயா் அறிவுறுத்தினாா்.
ஆய்வின் போது, மண்டல தலைவா் ஜவகா், மாமன்ற உறுப்பினா்கள் ஆச்சியம்மாள், சுனில், மாநகர தொழில்நுட்ப அலுவலா் பாஸ்கா், திமுக மாநகர செயலா் ப. ஆனந்த், துணைச் செயலா் வேல்முருகன், முன்னாள் மாமன்ற உறுப்பினா் சீத்தாமுருகன், வட்டச் செயலாளா் முருகன், நிா்வாகிகள் உடனிருந்தனா்.
