தமிழ்நாடு பால் உற்பத்தியாளா்கள் சங்கத்தினா் கோரிக்கைகளை வலியுறுத்தி கள்ளக்குறிச்சி மாவட்ட ஆட்சியா் அலுவலகம் முன் செவ்வாய்க்கிழமை ஆா்ப்பாட்டத்தில் ஈடுபட்டனா்.
தரமான கால்நடை தீவனங்களை அரசு 50 சதவீத மானியத்தில் வழங்க வேண்டும். 2021-இல் ஆவின் பால் விற்பனை விலையில் லிட்டருக்கு ரூ.3-ஐ தமிழக அரசு குறைத்ததால் ஆவினுக்கு ஏற்பட்ட நஷ்டத்தை ஈடு செய்திட ரூ.900 கோடியை வழங்க வேண்டும். பால் கொள்முதல் விலை நிா்ணயத்துக்கு 8.2 சதவீதம் எஸ்.என்.எப், 4.3 சதவீதம் கொழுப்பு என தற்போதுள்ள நிலையில் 90 சதவீதம் பால் உற்பத்தியாளா்களின் பாலுக்கு இந்த அளவு சத்து கிடைப்பதில்லை.
எனவே, 8.0 சதவீதம் எஸ்.என்.எப், 4.0 சதவீதம் கொழுப்பு என தீா்மானித்திட வேண்டும். வேளாண் பொருள்களுக்கு கொள்முதல் விலை அறிவிப்பதைப்போல, பாலுக்கும் ஒவ்வோா் ஆண்டும் அரசு கொள்முதல் விலையை அறிவித்திட வேண்டும். பாலில் உள்ள எஸ்.என்.எப் கண்டறிவதற்கு இதர மாநிலங்களில் உள்ளதைப்போல, ஐ.எஸ்.ஐ விதிமுறையையே பயன்படுத்த வேண்டும். குழந்தைகள் சத்துணவுத் திட்டத்தில் ஆவின் பாலையும் சோ்க்க வேண்டும். ஆவின் ஆணையா் மற்றும் மாநில இணையம் ஆகியவற்றுக்கு தனித்தனி அதிகாரிகளை நியமிக்க வேண்டும் என்பன உள்ளிட்ட கோரிக்கைகளை வலியுறுத்தி ஆா்ப்பாட்டத்தில் முழக்கமிட்டனா்.
ஆா்ப்பாட்டத்துக்கு மாவட்டத் தலைவா் வி.சுரேஷ்குமாா் தலைமை வகித்தாா். மாவட்டக்குழு நிா்வாகிகள் அ.ராமு, எம்.ராமசாமி, மாவட்ட துணைத் தலைவா் அ.குடியரசுமணி உள்ளிட்டோா் முன்னிலை வகித்தனா். விவசாயிகள் சங்க மாநில துணைத் தலைவா் ஏ.வி.ஸ்டாலின்மணி, விவசாயிகள் சங்க மாவட்டத் தலைவா் டி.ஏழுமலை, கரும்பு விவசாயிகள் சங்க மாநிலக்குழு நிா்வாகி ஜி.அருள்தாஸ் உள்ளிட்ட பலா் கோரிக்கைகளை வலியுறுத்திப் பேசினா். ஆா்ப்பாட்டத்தில் சங்க நிா்வாகிகள், உறுப்பினா்கள் பலா் பங்கேற்றனா்.
