புதுக்கோட்டையில் சனிக்கிழமை நடைபெற்ற 71-ஆவது அனைத்திந்திய கூட்டுறவு வார விழாவில், 721 பேருக்கு ரூ. 5.02 கோடி மதிப்பில் பல்வேறு கடனுதவிகளை மாநில சட்டத் துறை அமைச்சா் எஸ். ரகுபதி, மாநில பிற்படுத்தப்பட்டோா் நலத் துறை அமைச்சா் சிவ.வீ. மெய்யநாதன் ஆகியோா் வழங்கினா்.
மகளிா் சுய உதவிக்குழுக் கடன், கேசிசி பயிா்க் கடன், கூட்டுப் பொறுப்புக் குழு பயிா்க்கடன், கைம்பெண் கடன், மாற்றுத் திறனாளி கடன் ஆகிய கடன் திட்டங்களில் இந்தத் தொகைகள் காசோலைகளாக வழங்கப்பட்டன. மேலும், மாவட்ட அளவிலான சிறந்த கூட்டுறவுச் சங்கங்களுக்கு கேடயங்கள், பேச்சு, கட்டுரை, ஓவியப் போட்டிகளில் வென்ற மாணவ, மாணவிகளுக்கு பரிசுகளும் வழங்கப்பட்டன.
விழாவுக்கு, மாவட்ட ஆட்சியா் மு. அருணா தலைமை வகித்தாா். எம்எல்ஏக்கள் வை. முத்துராஜா (புதுக்கோட்டை), மா. சின்னதுரை (கந்தா்வகோட்டை), கூட்டுறவுச் சங்கங்களின் இணைப் பதிவாளா் அ. ஜீவா, மத்திய கூட்டுறவு வங்கி மேலாண்மை இயக்குநா் மு. தனலட்சுமி, துணைப் பதிவாளா் ப. மணிமேகலை, மூத்த வழக்குரைஞா் கே.கே. செல்லப்பாண்டியன், துணை மேயா் மு. லியாகத் அலி உள்ளிட்டோா் பங்கேற்றனா்.
