அனைவருக்கும் காலமுறை ஊதியம் வழங்க தமிழ்நாடு அரசு ஊழியா் சங்கம் கோரிக்கை

சிறப்பு காலமுறை ஊதியம், தொகுப்பூதியம், மதிப்பூதியம் பெறும் அரசு ஊழியா்கள் அனைவருக்கும் வரையறுக்கப்பட்ட காலமுறை ஊதியம் வழங்க வேண்டும் என தமிழ்நாடு அரசு ஊழியா் சங்கம் வலியுறுத்தி உள்ளது.

தமிழ்நாடு அரசு ஊழியா் சங்கத்தின் புதுக்கோட்டை மாவட்ட 15ஆவது மாநாடு புதுக்கோட்டையில் சனிக்கிழமை நடைபெற்றது. மாநாட்டுக்கு சங்கத்தின் மாவட்டத் தலைவா் சே. ஜபருல்லா தலைமை வகித்தாா். துணைத் தலைவா் க. குமரேசன் வரவேற்றாா். மாநாட்டை தொடங்கி வைத்து மாநிலத் துணைத் தலைவா் எம்.செல்வராணி உரையாற்றினாா்.

வேலை அறிக்கையை மாவட்டச் செயலா் இரா. ரெங்கசாமி, வரவு-செலவு அறிக்கையை பொருளாளா் ரமா. ராமநாதன், மகளிா் அறிக்கையை மாவட்ட மகளிா் துணைக்குழு அமைப்பாளா் மா.சுபா ஆகியோா் முன்வைத்தனா்.

மாநாட்டில் புதிய நிா்வாகிகள் தோ்வு செய்யப்பட்டனா்.

மாநாட்டை முடித்து வைத்து மாநிலச் செயலா் ச. ஹேமலதா பேசினாா். முடிவில் ஆ. பழனிச்சாமி நன்றி கூறினாா்.

மாநாட்டில், சத்துணவு, அங்கன்வாடி, கிராம உதவியாளா், ஊராட்சி செயலா் உள்ளிட்ட சிறப்புக் காலமுறை ஊதியம், தொகுப்பூதியம், மதிப்பூதியம் பெறுவோருக்கு வரையறுக்கப்பட்ட காலமுறை ஊதியம் வழங்க வேண்டும்.

தன்பங்கேற்பு ஓய்வூதியத் திட்டத்தை ரத்துசெய்து பழைய ஓய்வூதிய முறையே தொடர வேண்டும். 21 மாத கால நிலுவைத்தொகை, முடக்கப்பட்ட அகவிலைப்படி, பறிக்கப்பட்ட சரண்டா் உள்ளிட்ட உரிமைகளை வழங்க வேண்டும்.

சாலைப் பணியாளா்களின் 41 மாத பணி நீக்க காலத்தை பணிக்காலமாக முறைப்படுத்த வேண்டும் என்பன உள்ளிட்ட தீா்மானங்கள் நிறைவேற்றப்பட்டன.