``புதுச்சேரி மின்துறை புதிய புதிய பெயர்களில் கொள்ளை அடிக்கிறது!'' -பாஜக முன்னாள் எம்.எல்.ஏ காட்டம்

புதுச்சேரி பா.ஜ.க-வின் முன்னாள் தலைவரும், முன்னாள் எம்.எல்.ஏ-வுமான சாமிநாதன் மின்துறையின் கட்டணக் கொள்ளையை கடுமையாக சாடியிருக்கிறார். இதுகுறித்து அவர் வெளியிட்டிருக்கும் அறிக்கையில், ``புதுச்சேரி மாநிலத்தில் யூனிட் ஒன்றுக்கு ரூ. 7 முதல் ரூ.10 வரை வசூல் செய்து கொள்ளை அடிக்கும் துறையாக இருக்கிறது மின்துறை. இந்தியாவிலேயே பல்வேறு காரணங்களைக் குறிப்பிட்டுக் கட்டணங்களை வசூல் செய்வது புதுச்சேரி மின்துறையில் மட்டுமே. அதனால் புதுச்சேரி மக்கள் வரும் சட்டப்பேரவைத் தேர்தலில் ஏற்கெனவே ஆட்சி செய்த காங்கிரஸ் கட்சியை மட்டுமல்ல, தற்போது ஆட்சி செய்யும் கட்சியை வீழ்த்துவதற்கு தயாராக இருக்க வேண்டும். மின்கட்டணம் என்ற பெயரில் ஏழை நடுத்தர மக்களை இந்த அரசு மாதம்தோறும் ஏமாற்றி வருகிறது.

இந்தக் கட்டணங்கள் குறித்து பொது மேடையில் விவாதம் செய்வதற்கு அரசு இப்போதே தயாராகிக் கொள்ள வேண்டும். ஏனென்றால், இந்த கட்டணக் கொள்ளை குறித்து விரைவில் புதுச்சேரி மக்களை ஒன்றிணைத்து போராட்டத்தை நடத்த இருக்கிறோம். யூனிட்டுக்கு குறைந்த கட்டணம் என்ற பெயரில் Short Claim, FPPCA Charges, Surcharges, Fixed S.C., B.P.S.C., DL Adj Amount, Prompt PMT Re-bate, SD Interest, Subsidy, Excess Adjusted என மறைமுகமாக கட்டணங்களை வசூல் செய்து மக்களை ஏமாற்றி வருகிறது புதுச்சேரி அரசு. புதுச்சேரியை 50 ஆண்டுகள் ஆட்சி செய்த காங்கிரஸ் மட்டுமல்ல, தற்போது ஆட்சி செய்யும் அரசும் மக்களுக்கு எதிரானதாக இருக்கிறது. அதனால் இளைஞர்கள் அனைவரும் தலைமையேற்று புதிய அரசை உருவாக்க முன்வர வேண்டும்.

இந்த மாதம் மின் உபயோகிப்பாளர்களுக்கு கொடுக்கப்பட்ட மின்கட்டண ரசீதுகளை தற்போது வெளியிட்டிருக்கிறோம். அவற்றை ஒவ்வொருவரும் வாட்ஸ்-அப், ஃபேஸ்புக் உள்ளிட்ட சமூக வலைத்தளங்களில் வெளியிட்டு உங்கள் கண்டனங்களை அரசுக்கு தெரியப்படுத்த வேண்டும். இலவசம் என்ற பெயரில் 5, 10 மற்றும் 20 கிலோ அரிசியைக் கொடுத்துவிட்டு அதைவிட அதிகமான தொகையை, வரி என்ற பெயரில் மக்களிடமே வசூல் செய்து மக்களிடமே கொடுக்கும் ஏமாற்று வேலையை இந்த அரசு செய்து வருகிறது. பதவியும், ஆட்சியும் மட்டுமே ஆட்சியாளர்களுக்கு குறிக்கோளாக இருக்கிறது. அதனால் புதுச்சேரி மாநிலத்தை மீட்க பொதுமக்கள் ஒன்றிணைந்து போராட வேண்டும். இல்லையென்றால் புதுச்சேரி மாநிலம் மக்கள் வாழ்வதற்குத் தகுதியற்ற மாநிலமாக மாறிவிடும்.

பதவியை மட்டுமே குறிக்கோளாக கொண்டு செயல்படும் அரசியல்வாதிகளை மக்கள் இனம் காண வேண்டும். இந்த செய்தியை படிக்கும் அனைவரும் தங்களது வீட்டுக்கு வரும் மின்சார ரசீதில், எவ்வளவு யூனிட் செலவாகிறது என்பதை கணக்குப் போட்டுப் பார்த்து இந்த அரசின் பொய்யான வாக்குறுதியை தெரிந்து கொள்ள வேண்டும். மற்ற மாநிலங்களை ஒப்பிடும்போது புதுச்சேரி மாநிலத்தில் வசூலிக்கப்படும் கூடுதல் கட்டணம், மோசமான மீட்டர் போன்றவற்றால் மின்துறை சீரழிந்து வருகிறது. ரூ.500 மதிப்புள்ள அரிசியை இலவசமாக கொடுத்துவிட்டு, மின் கட்டணம், குப்பை வரி, வீட்டு வரி, பாதாள சாக்கடை வரி, தண்ணீர் வரி என மக்களிடம் ஆயிரக்கணக்கில் வசூல் செய்கிறது. அவற்றை எதிர்த்து மக்கள் போராட வேண்டும்” என்று குறிப்பிட்டிருக்கிறார்.