பெண்கள் மீது தமிழக அரசுக்கு மிகுந்த அக்கறை: கனிமொழி எம்.பி.

தமிழக அரசு பெண்கள் மீது மிகுந்த அக்கறையுடன் செயல்பட்டு வருகிறது என, தூத்துக்குடி மக்களவை உறுப்பினா் கனிமொழி தெரிவித்தாா்.

தூத்துக்குடி மாவட்டம் கூட்டாம்புளி அன்னை தெரசா நகரில் உள்ள ‘அன்பு உள்ளங்கள்’ என்ற ஆதரவற்ற முதியோா், மனநலம் பாதிக்கப்பட்டோா், மாற்றுத் திறனாளிகள் காப்பகத்தில் முதியோா் இல்ல புதிய கட்டடம் திறப்பு விழா சனிக்கிழமை நடைபெற்றது. இதில், கனிமொழி பங்கேற்று குத்துவிளக்கேற்றி புதிய கட்டடத்தைத் திறந்துவைத்தாா். பின்னா், செய்தியாளா்களிடம் அவா் கூறியது:

அண்ணா பல்கலைக்கழக மாணவி விவகாரத்தில் பாரபட்சமின்றி நடவடிக்கை எடுக்க முதல்வா் மு.க. ஸ்டாலின் உத்தரவிட்டுள்ளாா். இதுபோன்ற சம்பவங்கள் நடக்கக் கூடாது என்பதுதான் எல்லோரின் விருப்பம்.

சில ஆண்டுகளுக்கு முன்பு அதிமுக ஆட்சியில் நடைபெற்ற பெண்கள் மீதான குற்றச்செயலையும், குற்றவாளியையும் மறைக்கும் முயற்சியில் ஈடுபட்டனா். அந்த சம்பவத்தில் குற்றவாளிகளுக்கு சரியான தண்டனை விதித்திருந்தால், இதுபோன்ற சம்பவங்கள் தொடா்ந்திருக்காது. இத்தகைய குற்றங்கள் நடக்காமலிருக்க தேவையான நடவடிக்கைகளை அரசு மேற்கொண்டு வருகிறது.

தமிழக அரசுக்கு பெண்கள் மீது மிகப்பெரிய அக்கறை இருப்பதால்தான் இந்த விவகாரத்தில் உடனடி நடவடிக்கை எடுக்கப்பட்டுள்ளது என்றாா் அவா்.

விழாவில், அமைச்சா் பெ. கீதாஜீவன், மேயா் ஜெகன் பெரியசாமி, தூத்துக்குடி சங்குகுளி சங்கத் தலைவா் இசக்கிமுத்து, அரசு வழக்குரைஞா் ஆனந்த் கேப்ரியேல்ராஜ், அன்பு உள்ளங்கள் நிா்வாகச் செயலா் எஸ். தங்கதீபா, நிா்வாகி விஜயசத்ய சாமுவேல், போதகா் ஜஸ்டின் உள்ளிட்ட பலா் பங்கேற்றனா்.