ஆஸ்திரேலியா டிக்ளேர் செய்திருக்க வேண்டுமா? மிட்செல் ஸ்டார்க் கூறிய அசத்தல் பதில்!

ஆஸ்திரேலிய அணி டிக்ளேர் செய்திருக்க வேண்டுமா என்ற கேள்விக்கு மிட்செல் ஸ்டார்க் பதிலளித்துள்ளார்.

இந்தியா மற்றும் ஆஸ்திரேலிய அணிகளுக்கு இடையேயான பாக்ஸிங் டே டெஸ்ட் போட்டி விறுவிறுப்பாக சென்று கொண்டிருக்கிறது. நான்காம் நாள் ஆட்டநேர முடிவில் ஆஸ்திரேலிய அணி அதன் இரண்டாவது இன்னிங்ஸில் 9 விக்கெட்டுகளை இழந்து 228 ரன்கள் எடுத்துள்ளது.

நாதன் லயன் மற்றும் ஸ்காட் போலண்ட் இருவரும் இந்திய அணிக்கு பெரும் தலைவலியாக உள்ளனர். இந்த இணை 10-வது விக்கெட்டுக்கு 50 ரன்களுக்கும் அதிகமாக குவித்து விளையாடி வருகிறது. ஆஸ்திரேலிய அணி இந்தியாவைக் காட்டிலும் 333 ரன்கள் முன்னிலையில் உள்ளனர்.

இதையும் படிக்க: என்னுடைய திறன் மீது சந்தேகப்பட்டவர்களுக்கு... நிதீஷ் குமார் ரெட்டி பேசியதென்ன?

மிட்செல் ஸ்டார்க் கொடுத்த பதில்

பாக்ஸிங் டே டெஸ்ட் போட்டியில் ஆஸ்திரேலிய அணி வலுவாக உள்ள நிலையில், தனக்கு காயம் ஏற்படும் அபாயம் இல்லை எனவும், நாளை 20 ஓவர்கள் வீசவும் முழு உடல் தகுதியுடன் தயாராக இருக்கிறேன் எனவும் மிட்செல் ஸ்டார்க் தெரிவித்துள்ளார்.

இது தொடர்பாக அவர் பேசியதாவது: பாக்ஸிங் டே டெஸ்ட் போட்டியின் கடைசி நாளில் 98 ஓவர்கள் விளையாடப்பட உள்ளது. ஆட்டம் எப்படி செல்கிறது என்பதைப் பொறுத்தே நான் எத்தனை ஓவர்கள் வீசுவேன் என்பது தெரியும். இரண்டாவது இன்னிங்ஸில் பந்துவீசுவதற்கு நான் முழுவதும் தயாராக இருக்கிறேன். எனக்கு எந்த ஒரு அசௌகரியமும் இல்லை. எனது பந்துவீச்சில் வேகம் இருக்கிறது. நான் கிட்டத்தட்ட மணிக்கு 140 கிலோ மீட்டர் வேகத்தில் பந்துவீசுகிறேன். அதனால், பந்துவீசுவது என்பது எனக்கு கவலையளிக்கும் விஷயமாக இல்லை. நாளை போட்டியில் 20 ஓவர்கள் வீசும் நிலை ஏற்பட்டால், கண்டிப்பாக 20 ஓவர்களையும் வீசுவேன் என்றார்.

இதையும் படிக்க: “200 விக்கெட்டுகள்...” டெஸ்ட் போட்டிகளில் ஜஸ்பிரித் பும்ரா புதிய சாதனை!

போட்டியின் நான்காம் நாளான இன்று ஆஸ்திரேலிய அணி டிக்ளேர் செய்துவிட்டு, இந்திய அணியை பேட்டிங் செய்ய வைத்திருக்க வேண்டுமா என்ற கேள்வி மிட்செல் ஸ்டார்க்கிடம் கேட்கப்பட்டது.

இந்த கேள்விக்கு மிட்செல் ஸ்டார்க் பதிலளித்ததாவது: இந்த கேள்வியை அணியின் கேப்டன் பாட் கம்மின்ஸிடம்தான் நீங்கள் கேட்க வேண்டியிருக்கும் என பதிலளித்தார்.