தமிழக அரசு பொங்கல் பரிசுத் தொகுப்புடன் குடும்ப அட்டைதாரா்களுக்கு ரூ. 3 ஆயிரம் வழங்க வேண்டும் என தமிழ் மாநில காங்கிரஸ் கட்சித் தலைவா் ஜி.கே. வாசன் தெரிவித்தாா்.
மதுரையில் சனிக்கிழமை செய்தியாளா்களிடம் அவா் மேலும் கூறியதாவது :
அண்ணா பல்கலை மாணவி பாலியல் வன்கொடுமைக்கு உள்ளாக்கப்பட்ட விவகாரத்தில் உண்மையை மறைக்க தமிழக அரசும், காவல் துறையும் முயற்சிப்பது மக்களுக்கு இழைக்கப்படும் அநீதி. பாதிக்கப்பட்ட மாணவிக்கு நீதி கேட்டுப் போராட்டம் நடத்த அனுமதி மறுப்பதும், போராட்டத்தில் ஈடுபடுவோரை கைது செய்வதும் ஜனநாயகத்துக்கு ஏற்புடையதல்ல.
அண்மைக்காலமாக, போராட்டத்தில் ஈடுபடும் பெண்களின் மதிப்பைக் குறைக்கும் முயற்சிகளில் திமுக அரசு ஈடுபட்டு வருகிறது. இரு நாள்களுக்கு முன்பு சென்னையில் போராட்டம் நடத்த முற்பட்ட பாமக மகளிரணித் தலைவா் சௌமியா அன்புமணி, போராட்ட இடத்துக்கு வந்த உடனேயே கைது செய்யப்பட்டாா். வெள்ளிக்கிழமை மதுரையில் போராட்டத்தில் ஈடுபட்ட பாஜக மகளிரணியினரை கைது செய்து, ஆட்டுமந்தைக்கு அருகில் தங்க வைக்கப்பட்டனா். பெண்களின் மதிப்பைக் குறைக்க முயலும் இதுபோன்ற நடவடிக்கைகளை அரசு திருத்திக் கொள்ள வேண்டும்.
திமுக கூட்டணியில் அங்கம் வகிக்கும் ஓா் தேசியக் கட்சியின் தலைவா், நேரடியாக முதல்வரைச் சந்தித்து திமுக ஆட்சியின் அடக்குமுறைகளை, தவறுகளை சுட்டிக்காட்டியிருப்பது, அரசின் தவறானப் போக்கை வெளிச்சம்போட்டு காட்டியுள்ளது. விருதுநகா் மாவட்டத்தில் பட்டாசு ஆலைகளில் விபத்தைத் தவிா்க்கத் தேவையான முன்னெச்சரிக்கை நடவடிக்கைகளை தமிழக அரசு உறுதி செய்ய வேண்டும்.
நெல்லை - சென்னை வந்தேபாரத் ரயில் மக்களின் வரவேற்பைப் பெற்றுள்ளது. ஆனால், இந்த ரயில் 8 பெட்டிகளுடன் மட்டுமே இயக்கப்படுகிறது. இந்த ரயிலில், கூடுதலாக 10 பெட்டிகளை இணைத்து இயக்க வேண்டும். ஜல்லிக்கட்டு போட்டியில் உயிரிழக்கும் மாடு பிடி வீரா்களுக்கு அரசு ரூ. 20 லட்சம் இழப்பீடு வழங்க வேண்டும்.
மக்களைப் பாதிக்கும் எந்தத் திட்டத்தையும் அனுமதிக்கக் கூடாது என்பதே தமாகாவின் நிலைப்பாடு. மேலூா் டங்ஸ்டன் கனிமச் சுரங்கம் விவகாரத்தில் சில மாதங்கள் அமைதியாக இருந்து வேடிக்கைப்பாா்த்த தமிழக அரசு, இறுதியில் எதிராக திரும்பியது புதிராக உள்ளது என்றாா் ஜி.கே. வாசன்.
உறுப்பினா் அட்டை வழங்கல்...
இதையடுத்து, மதுரை மண்டலத்துக்குள்பட்ட 10 மாவட்டங்களுக்கான தமாகா உறுப்பினா் அடையாள அட்டை வழங்கும் பணியை ஜி.கே. வாசன் தொடங்கி வைத்தாா்
