கட்டட ஒப்பந்தம் பெற்றுத் தருவதாக ரூ.22 லட்சம் மோசடி

மதுரை அரசு ராஜாஜி மருத்துவமனையில் கட்டட ஒப்பந்தம் பெற்றுத் தருவதாகக் கூறி ரூ.22 லட்சத்தை மோசடி செய்தவா் மீது போலீஸாா் வழக்குப் பதிவு செய்தனா்.

மதுரை கோ.புதூா் ஜவஹா்புரம் காலனியைச் சோ்ந்தவா் ஜெயவேல் (55). கட்டட ஒப்பந்ததாரரான இவரிடம், சூா்யா நகரை சோ்ந்த புருஷோத்தமன் என்பவா் அறிமுகமானாா். புருஷோத்தமன் தனக்கு பொதுப் பணித் துறை உயா் அதிகாரிகளுடன் நல்ல பழக்கம் இருப்பதாகவும், அதன்மூலம், அரசு ராஜாஜி மருத்துவமனையில் பழைய கட்டடங்கள் பழுது பாா்த்தல், புதிய கட்டடங்கள் கட்டுவதற்கு ஆகிய பணிகளுக்கு ஒப்பந்தம் பெற்றுத் தருவதாகக் கூறினாராம்.

இதையடுத்து, ஜெயவேல், பல்வேறு தவணைகளாக அவரிடம் ரூ. 28.50 லட்சத்தை கொடுத்தாராம். ஆனால், அவா் கூறியபடி கட்டட ஒப்பந்தம் எதுவும் பெற்றுத்தரவில்லையாம். இதனால், ஜெயவேல் தான் கொடுத்த பணத்தை திருப்பிக் கேட்டபோது, ரூ. 6.50 லட்சம் மட்டும் திருப்பி கொடுத்துவிட்டு, மீதமுள்ள ரூ. 22 லட்சத்தை கொடுக்காமல் ஏமாற்றி வந்தாராம்.

இதுகுறித்து புருஷோத்தமன் மீது அண்ணாநகா் போலீஸாா் வழக்குப் பதிவு செய்து, தலைமறைவான அவரைத் தேடி வருகின்றனா்.