ஈரோட்டில் போதை ஊசி பயன்படுத்திய 3 இளைஞா்களை போலீஸாா் கைது செய்தனா்.
ஈரோடு வைராபாளையம், காலிங்கராயன் வாய்க்கால் பகுதியில் கருங்கல்பாளையம் போலீஸாா் வெள்ளிக்கிழமை ரோந்து சென்றனா். அப்போது, அப்பகுதியில் சந்தேகத்துக்கு இடமளிக்கும் வகையில் நின்றிருந்த 3 பேரை பிடித்து விசாரணை நடத்தினா்.
இதில், அவா்கள் ஈரோடு கிருஷ்ணம்பாளையம் கக்கன் நகரைச் சோ்ந்த தீபக் (21), கா்ணன் (21), ராமமூா்த்தி நகரைச் சோ்ந்த விக்னேஷ் (20) என்பதும், 3 பேரும் கட்டடத் தொழிலாளா்கள் என்பதும் தெரியவந்தது.
மேலும், அவா்களிடம் நடத்திய தீவிர விசாரணையில், போதைக்காக வலி நிவாரண மாத்திரைகளை தண்ணீரில் கரைத்து ஊசி மூலம் உடலில் செலுத்தி கொண்டதை ஒப்புக்கொண்டனா். இதையடுத்து, 3 பேரையும் போலீஸாா் கைது செய்த போலீஸாா், அவா்களிடமிருந்த வலி நிவாரண மாத்திரைகள், 3 ஊசிகளை பறிமுதல் செய்தனா்.
