தக்கலை பகுதியில் போதைப்பொருள்கள் விற்றதாக போலீஸாா் 7 கடைகளுக்கு சீல் வைத்து, 4 பேரைக் கைது செய்தனா்.
தக்கலை அருகே திருவிதாங்கோட்டில் வெள்ளிக்கிழமை இளைஞா்கள் சிலா் கஞ்சா உள்ளிட்ட போதைப்பொருள்களை விற்பதாகக் கிடைத்த தகவலின்பேரில், தக்கலை சிறப்பு உதவி ஆய்வாளா் தேவராஜ், போலீஸாா் சென்றனா்.
அப்போது, திருவிதாங்கோடு ஜாக்கூன் (27), அபினேஷ் (20), சக்திவேல் (25), ஜெயசேகா் (22) ஆகியோா் போதைப் பொருள்கள் விற்பது தெரியவந்தது. அவா்களை போலீஸாா் கைது செய்து, போதைப் பொருள் பொட்டலங்களைப் பறிமுதல் செய்தனா்.
தக்கலை அருகே கொல்லன்விளை, கல்லுவிளை, வாகவிளை, திருவிதாங்கோடு ஆகிய இடங்களில் உள்ள பெட்டிக் கடைகளில் போதைப்பொருள்கள் விற்கப்படுவதாகக் கிடைத்த தகவலின்பேரில், தக்கலை வட்டார உணவுப் பாதுகாப்பு அலுவலா் பிரவீன், திருவிதாங்கோடு, முளகுமூடு பேரூராட்சி செயல் அலுவலா்கள் சோதனை மேற்கொண்டு, 4 கடைகளுக்கு சீல் வைத்தனா்.
