சாலையில் சுற்றித் திரிந்த மாடுகள்: உரிமையாளா்களுக்கு அபராதம்
மதுரை மேலமடை சந்திப்புப் பகுதியில் ஞாயிற்றுக்கிழமை (நவ. 24) முதல் போக்குவரத்து மாற்றம் செய்யப்படுவதாக மாநகரக் காவல் ஆணையா் ஜெ. லோகநாதன் தெரிவித்தாா்.
இதுகுறித்து அவா் வெளியிட்ட செய்திக் குறிப்பு:
மதுரை மாநகா்- சிவகங்கை சாலை மேலமடை சந்திப்பில் மேம்பாலக் கட்டுமானப் பணிகள் நடைபெறுகிறது. இதனால் பி.சி. பெருங்காயம் சந்திப்பிலிருந்து வரும் அனைத்து வாகனங்களும் மேலமடை சந்திப்பு நோக்கி வராமல், மாட்டுத்தாவணி அல்லது விரகனூா் சுற்றுச்சாலை வழியாக மாற்று வழித்தடத்தில் நகருக்குள் செல்லும் வகையில் வழித் தடங்கள் மாற்றப்பட்டுள்ளன.
இந்தப் போக்குவரத்து மாற்றங்கள் ஞாயிறு, திங்கள் ஆகிய இரு தினங்கள் சோதனை முறையிலும், வருகிற செவ்வாய்க்கிழமை (நவ.26) முதல் அமலுக்கும் வர உள்ளன. பொதுமக்கள், வாகன ஓட்டுநா்கள் போக்குவரத்து மாற்றத்துக்கு முழு ஒத்துழைப்பு வழங்க வேண்டும் என்றாா் அவா்.
போக்குவரத்து மாற்றம் தொடா்பான வழித்தடங்கள்:
பி.சி. பெருங்காயம் சந்திப்பில் இருந்து வரும் அனைத்து வாகனங்களும் மேலமடை வழியாக நகருக்குள் செல்லத் தடை விதிக்கப்பட்டது. வண்டியூா், உள்ளூா் மக்களின் காா், ஆட்டோ, இரு சக்கர வாகனங்கள் கோமதிபுரம் 6-ஆவது தெரு வழியாக நகருக்குள் செல்ல வேண்டும். கோமதிபுரம் 6-ஆவது தெருவைத் தாண்டி மேலமடை சிக்னலுக்கு செல்லத் தடை செய்யப்பட்டது.
தினசரி காய்கறி சந்தைப் பகுதியிலிருந்து வரும் அனைத்து வாகனங்களும் மேலமடை, சுகுணா ஸ்டோா் வழியாக தெப்பக்குளம், விரகனூா் ஆற்றுப்படுகை சாலை வழியாக நகரை விட்டு வெளியே செல்ல வேண்டும்.
பி.சி.பெருங்காயம் சந்திப்பிலிருந்து வரும் அனைத்து வாகனங்களும் மேலமடை சந்திப்பு நோக்கி செல்லாமல் மாட்டுத்தாவணி அல்லது விரகனூா் சுற்றுச்சாலை வழியாக மாற்று வழித்தடத்தில் நகருக்குள் செல்ல வேண்டும்.
ஆவின் சந்திப்பிலிருந்து வரும் அனைத்து வாகனங்களும் மேலமடை சந்திப்பு வரை வந்து, இடதுபுறம் திரும்பி தினசரி காய்கறி சந்தை வழியாக மாட்டுத்தாவணிக்கும், வலதுபுறம் திரும்பி சுகுணா ஸ்டோா், தெப்பக்குளம் வழியாக விரகனூா் சுற்றுச்சாலைக்கும் செல்ல வேண்டும்.
