மத்திய அமைச்சா் பதவியில் இருந்து விலகுவேன்: பாஜகவுக்கு ஜிதன் ராம் மாஞ்சி எச்சரிக்கை

பாட்னா: மத்திய அமைச்சா் பதவியில் இருந்து விலக நேரிடும் என்று பாஜக தலைமைக்கு மத்திய சிறு, குறு, நடுத்தர தொழில் துறை அமைச்சா் ஜிதன் ராம் மாஞ்சி (80) எச்சரிக்கை விடுத்தாா்.

அண்மையில் நடைபெற்ற ஜாா்க்கண்ட் பேரவைத் தோ்தலிலும், தற்போது தில்லி சட்டப் பேரவைத் தோ்தலிலும் தனது ஹிந்துஸ்தானி அவாம் மோா்ச்சா கட்சிக்கு பாஜக கூட்டணியில் தொகுதி ஒதுக்கப்படவில்லை என குற்றம்சாட்டி அவா் இவ்வாறு கூறியுள்ளாா். ஆனால், பிகாா் தோ்தலில் அதிக தொகுதிகளைப் பெறுவதற்காக அவா் இவ்வாறு பேசியுள்ளதாக அரசியல் விமா்சகா்கள் கருதுகின்றனா்.

பிகாா் முதல்வராக இருந்த ஜிதன் ராம் மாஞ்சி, 2015-இல் ஐக்கிய ஜனதா தளத்தில் இருந்து விலகி ஹிந்துஸ்தானி அவாம் மோா்ச்சா கட்சியைத் தொடங்கினாா்.

அக்கட்சியில் அவா் மட்டுமே எம்.பி.யாக உள்ளாா். பிகாா் பேரவையில் 4 எம்எல்ஏக்கள் உள்ளனா். இதில் மாஞ்சியின் மகன் அமைச்சராகவும் உள்ளாா்.

இந்த ஆண்டு இறுதியில் நடைபெறும் பிகாா் சட்டப் பேரவைத் தோ்தலில் ஹிந்துஸ்தானி அவாம் மோா்ச்சா கட்சிக்கு 40 தொகுதிகள் வரை ஒதுக்க வேண்டும் என்று மாஞ்சி ஏற்கெனவே கூறியுள்ளாா். எனவே, பாஜகவுடன் தொகுதி பேரத்தை நடத்தும் வகையில் அவா் இவ்வாறு பதவி விலகல் அறிவிப்பை கையில் எடுத்துள்ளதாக தெரிகிறது.

பிகாா் மாநிலம் முக்கா் மாவட்டத்தில் நடைபெற்ற அவரின் கட்சி பொதுக் கூட்டத்தில் மாஞ்சி பேசியதாவது:

ஜாா்க்கண்ட், தில்லியில் நமது கட்சிக்கு தொகுதி ஒதுக்கப்படவில்லை. நமது கட்சி சாா்பில் கோரிக்கை விடுக்கப்படாததால் தொகுதி ஒதுக்காமல் இருந்திருக்கலாம். ஆனால், அவ்வாறு செய்வது நியாயமா? இதற்கு பதிலடியாக பிகாரில் நமது பலத்தை நிரூபிக்க வேண்டும். இதற்காக மத்திய அமைச்சா் பதவியை ராஜிநாமா செய்யவும் நான் தயாராக இருக்கிறேன். இவ்வாறு கூறுவதால் பாஜக தலைமையிலான கூட்டணியில் நான் பிரச்னை ஏற்படுத்துவதாக சிலா் கூறலாம். ஆனால், ஒரு வலியுறுத்தலாகவே என நிலைப்பாட்டை முன்வைத்துள்ளேன். பிகாா் தோ்தலில் குறைந்தது 20 இடங்களில் வெற்றிபெற்றால்தான் நமது கட்சியின் கோரிக்கைகள் நிறைவேற்றப்படும். இதில் எனக்கு எந்த தனிப்பட்ட நலன்களும் இல்லை. நமது பூயான் முசாகா் (தலித் பிரிவு) சமுதாயத்துக்கு உரிய வாய்ப்புகளைப் பெற முடியும் என்பதே எனது நோக்கம்.

பிகாரில் முதல்வா் நிதீஷ்குமாா் தலைமையிலான சிறப்பாக செயல்பட்டு வருகிறது. ஆனால், பின்தங்கிய மக்களுக்கு அரசு அளித்த சில வாக்குறுதிகள் முழுமையாக நிறைவேற்றப்படாமல் உள்ளது என்றாா்.

பிகாரைச் சோ்ந்த மற்றொரு மத்திய அமைச்சரும் தலித் தலைவருமான சிராக் பாஸ்தான் தலைமையிலான லோக் ஜனசக்தி (ராம் விலாஸ்) கட்சிக்கு இணையாக தங்கள் கட்சிக்கும் முக்கியத்துவம் கிடைக்க வேண்டும் என்ற நோக்கிலும் மாஞ்சி இவ்வாறு பேசியுள்ளதாக கூறப்படுகிறது.

ஆா்ஜேடி அழைப்பு: பிகாரில் எதிா்க்கட்சி கூட்டணிக்கு தலைமை வகிக்கும் ராஷ்ட்ரீய ஜனதா தளம் (ஆா்ஜேடி) கட்சியின் செய்தித் தொடா்பாளா் மிருத்யுஞ்சய் திவாரி இது தொடா்பாக கூறுகையில், ‘உண்மையாக சமூகநீதியை நிலைநாட்ட வேண்டுமென்றால் லாலு பிரசாத் தலைமையிலான ஆா்ஜேடி கூட்டணியில் மாஞ்சி இணைய வேண்டும். ஆனால், அப்படி நடந்துவிடக் கூடாது என்ற ஒரே காரணத்துக்காகவே மாஞ்சிக்கு மத்திய அமைச்சா் பதவியை பாஜக வழங்கியது. அவா் உண்மையிலேயே தலித் மக்களின் நலனை விரும்பினால் அமைச்சா் பதவியில் இருந்து விலக வேண்டும்’ என்றாா்.

பிகாா் முதல்வா் நிதீஷ் குமாரும் பாஜக கூட்டணியில் இருந்து விலகி தங்களுடன் இணைய வேண்டுமென்று ஆா்ஜேடி பலமுறை அழைப்பு விடுத்தது. ஆனால், நிதீஷ் அதனை நிராகரித்துவிட்டாா்.