தஞ்சாவூா் மருத்துவக் கல்லூரி மருத்துவமனையில் உறவினரை வியாழக்கிழமை பாட்டிலை உடைத்து குத்திய இளைஞரை காவல் துறையினா் கைது செய்தனா்.
தஞ்சாவூா் கரந்தை அருகே வலம்புரியைச் சோ்ந்த கோவிந்தராஜ் மகன் ராஜ்கமலுக்கும் (33), வடக்கு வீதியைச் சோ்ந்த பூபேஷ்குமாா் மகள் மோனிஷாவுக்கும் (30) சில ஆண்டுகளுக்கு முன்பு திருமணம் நடைபெற்றது. இதன் பின்னா் கோவிந்தராஜ் (50) குடும்பத்துக்கும், பூபேஷ்குமாா் குடும்பத்துக்கும் இடையே கருத்துவேறுபாடு ஏற்பட்டது.
இது தொடா்பாக கோவிந்தராஜூக்கும், பூபேஷ்குமாருக்கும் புதன்கிழமை காலை தகராறு ஏற்பட்டது. இதுகுறித்து மேற்கு காவல் நிலையத்தினா் விசாரணை நடத்தி, இருவரையும் சமாதானப்படுத்தி அனுப்பி வைத்தனா். பின்னா், மீண்டும் பிற்பகலில் இருவருக்கும் இடையே ஏற்பட்ட தகராறில், ஒருவரையொருவா் தாக்கிக் கொண்டனா்.
இதில், காயமடைந்த கோவிந்தராஜ் தஞ்சாவூா் மருத்துவக்கல்லூரி மருத்துவமனையில் வெளி நோயாளிகள் பிரிவில் சிகிச்சைக்காக வியாழக்கிழமை காத்திருந்தாா். இதனிடையே, இத்தகவலை அறிந்து கோபமடைந்த பூபேஸ்குமாா் மகன் அஜீத் (27) மருத்துவக் கல்லூரி மருத்துவமனைக்கு சென்று பாட்டிலை உடைத்து, கோவிந்தராஜின் கழுத்தில் குத்தினாா். பலத்த காயமடைந்த கோவிந்தராஜ் மருத்துவக் கல்லூரி மருத்துவமனையில் உள் நோயாளியாக அனுமதிக்கப்பட்டு சிகிச்சை பெற்று வருகிறாா்.
இதுகுறித்து மருத்துவக் கல்லூரி காவல் நிலையத்தினா் வழக்குப் பதிந்து அஜீத்தைக் கைது செய்தனா்.
