கணவனை சிறைக்கு அனுப்ப திட்டம்; மகளை கொன்றுவிட்டு காதலனுடன் பார்ட்டி நடத்திய பெண்- அதிர்ச்சி சம்பவம்

உத்தரப்பிரதேச மாநிலம், லக்னோவை சேர்ந்தவர் ரோஸ்னி கான். அங்குள்ள காந்தாரி பஜார் பகுதியில் வசித்து வரும் ரோஸ்னி கடந்த சில ஆண்டுகளாக தனது கணவனிடமிருந்து பிரிந்து வாழ்ந்து வந்தார். அவர்களுக்கு 6 வயதில் சோனா என்ற மகள் இருந்தார். ரோஸ்னிக்கு உதித் ஜெய்ஸ்வால் என்ற காதலன் இருக்கிறார். ரோஸ்னி திடீரென அதிகாலை 3 மணிக்கு போலீஸாருக்கு போன் செய்து தனது மகளை தனது கணவர் ஷாருக் கொலை செய்துவிட்டதாக தெரிவித்தார். உடனே போலீஸார் சம்பவ இடத்திற்கு விரைந்து வந்தனர். போலீஸார் வந்தபோது கொலை செய்யப்பட்டு கிடந்த சிறுமியின் உடம்பில் பூச்சிகள் இருந்தன. தற்போது நடந்த கொலை போன்று தெரியவில்லை.

உடலை போலீஸார் பிரேத பரிசோதனைக்கு அனுப்பினர். இதில் சிறுமி 36 மணி நேரத்திற்கு முன்பே கொலை செய்யப்பட்டு இருக்கவேண்டும் என்று டாக்டர்கள் தெரிவித்தனர். விசாரணையில் ரோஸ்னியும், அவரது காதலன் உதித் என்பவரும் சேர்ந்து கொலை செய்திருப்பது தெரிய வந்தது. இது குறித்து போலீஸ் அதிகாரி விஷ்வஜீத் கூறுகையில்,''ரோஸ்னி கடந்த இரண்டு ஆண்டுகளாக காதலன் உதித் ஜெய்ஸ்வால் என்பவருடன் வசித்து வந்துள்ளார். ரோஸ்னியின் கணவர் தனது மகளை பார்க்க இரவு வந்துள்ளார். வீட்டில் அவர் தனது மனைவியுடன் வாக்குவாதம் செய்துவிட்டு சென்றுவிட்டார். அதன் பிறகு காதலனுடன் சேர்ந்து கொலை செய்துள்ளார். ரோஸ்னி அடிக்கடி தனது வாக்குமூலத்தை மாற்றிக்கொண்டே இருந்தார். இதையடுத்து காதலன் உதித்தும் போலீஸ் நிலையத்திற்கு வரவைக்கப்பட்டார்.

விசாரணையில் உதித் உண்மையை ஒப்புக்கொண்டார். அவரும், ரோஸ்னியும் சேர்ந்து இக்கொலையை செய்துள்ளனர். கணவனை சிறைக்கு அனுப்பவேண்டும் என்று கருதி சோனாவை இரண்டு பேரும் கொலை செய்துள்ளனர். அதோடு சோனாவின் உடம்பு முழுவதும் காயங்களை ஏற்படுத்தி இருந்தனர். சோனாவின் உடலை முன்பு வைத்துக்கொண்டு இருவரும் பார்ட்டி நடத்தியுள்ளனர்'' என்று தெரிவித்தார். ரோஸ்னி தனது கணவரிடமிருந்து வீட்டை பிடுங்குவதற்கு தனது கணவன் மீது போலீஸில் பல்வேறு புகார் கொடுத்துள்ளார். அதோடு கணவர் ஷாருக் பெற்றோர் மீதும் குற்றம் சாட்டி அவர்களை சிறைக்கு அனுப்பியது விசாரணையில் தெரிய

வந்தது.