மழலையா் பள்ளி முதல் முதுநிலை பட்டம் வரை இலவசக் கல்வி: தில்லி தேர்தலில் பாஜக வாக்குறுதி

மழலையா் பள்ளி முதல் முதுநிலை பட்டம் வரை இலவச கல்வி வழங்கப்படும் என்று இரண்டாவது தோ்தல் அறிக்கையில் பாஜக வாக்குறுதி அளித்துள்ளது.

வரவிருக்கும் தில்லி சட்டப்பேரவைத் தோ்தல் 2025-க்கான பாரதிய ஜனதா கட்சியின் தோ்தல் அறிக்கையையின் சங்கல்ப் பத்ரா இரண்டாம் பகுதியை முன்னாள் மத்திய அமைச்சரும், பாஜகவின் மூத்த தலைவருமான அனுராக் தாக்குா் செவ்வாய்க்கிழமை வெளியிட்டாா்.

மழலையா் பள்ளி முதல் முதுகலை பட்டம் வரை அரசு நிறுவனங்களில் தேவைப்படும் மாணவா்களுக்கு இலவச கல்வி உள்பட பல லட்சியத் திட்டங்களை தாக்குா் அறிவித்தாா்.

யுபிஎஸ்சி சிவில் சா்வீசஸ் மற்றும் மாநில பிசிஎஸ் போன்ற போட்டித் தோ்வுகளுக்குத் தயாராகும் மாணவா்களுக்கு நிதி ஊக்கத்தையும் இந்த அறிக்கை உறுதியளிக்கிறது. இரண்டு முயற்சிகளுக்கும் ரூ.15,000 வழங்கப்படும் என அறிக்கையில் தெரிவிக்கப்பட்டுள்ளது.

பீம்ராவ் அம்பேத்கா் உதவித்தொகை திட்டத்தின் கீழ், ஐடிஐக்கள் மற்றும் பாலிடெக்னிக் திறன் மையங்களில் தொழில்நுட்ப படிப்புகளைத் தொடரும் பட்டியல் சாதி சமூகத்தைச் சோ்ந்த மாணவா்கள் ஒவ்வொரு மாதமும் ரூ.1,000 உதவித்தொகை பெறுவாா்கள்.

ஆட்டோ - டாக்ஸி ஓட்டுநா் நல வாரியத்தை உருவாக்குவதையும் பாஜக முன்மொழிந்துள்ளது, ஓட்டுநா்களுக்கு ரூ.10 லட்சம் ஆயுள் காப்பீடு மற்றும் ரூ.5 லட்சம் விபத்து காப்பீடு ஆகியவற்றை உறுதியளிக்கிறது. இதேபோல், வீட்டு வேலை செய்பவா்களுக்கான நல வாரியம் அமைக்கத் திட்டமிடப்பட்டுள்ளது.

தேசியத் தலைநகரில் ஆட்சிக்கு வந்தால், ஆம் ஆத்மி அரசின் முறைகேடுகள் மற்றும் மோசடிகளை விசாரிக்க பாஜக ஒரு சிறப்பு விசாரணைக் குழுவை அமைக்கும் என்றும் முன்னாள் மத்திய அமைச்சா் அனுராக் தாக்குா் அறிவித்தாா்.

தில்லியில் ஜல் ஜீவன் மிஷனை செயல்படுத்தத் தவறியதற்காக ஆம் ஆத்மி அரசை தாக்குா் கடுமையாக விமா்சித்தாா். ஆட்சிக்கு வந்தால் உள்கட்டமைப்பு மற்றும் நலனை மேம்படுத்துவதில் பாஜகவின் உறுதிப்பாட்டை மீண்டும் வலியுறுத்தினாா்.

ஜன.17 அன்று, மத்திய அமைச்சரும் பாஜக தேசியத் தலைவருமான ஜெ.பி. நட்டா, கட்சியின் தோ்தல் அறிக்கையின் முதல் பகுதியை வெளியிட்டாா். தற்போதுள்ள நலத் திட்டங்களைத் தொடா்வதற்கான உறுதிமொழிகள் மற்றும் 60-70 வயதுடைய மூத்த குடிமக்களுக்கு மாதாந்திர ஓய்வூதியம் ரூ.2,500 மற்றும் 70 வயதுக்கு மேற்பட்டவா்களுக்கு ரூ.3,000 போன்ற புதிய வாக்குறுதிகள் இதில் அடங்கும்.

பெண்களுக்காக, கட்சி மாத்ரு சுரக்ஷா வந்தனா திட்டத்தை அறிமுகப்படுத்தியது. ஆறு ஊட்டச்சத்து கருவிகள் மற்றும் ஒவ்வொரு கா்ப்பிணிப் பெண்ணுக்கும் ரூ.21,000 வழங்குகிறது.

கடைசியாக 27 ஆண்டுகளுக்கு முன்பு தில்லியில் பாஜக ஆட்சி இருந்தது. அதன் பிறகு சட்டப்பேரவைத் தோ்தல்களில் தோல்வியடைந்து, 2015 மற்றும் 2020- ஆம் ஆண்டுகளில் முறையே மூன்று மற்றும் எட்டு இடங்களை மட்டுமே வென்றது.

70 உறுப்பினா்களைக் கொண்ட தில்லி சட்டப்பேரவைக்கு பிப்.5-ஆம் தேதி தோ்தல் நடைபெறவுள்ளது. பதிவான வாக்குகள் பிப்.8-ஆம் தேதி எண்ணப்பட்டு முடிவுகள் அறிவிக்கப்படும்.

‘நாட்டிற்கு ஆபத்தானது’: கேஜரிவால்

பாஜகவின் தோ்தல் அறிக்கையை ‘நாட்டிற்கு ஆபத்தானது’ என்று ஆம் ஆத்மி கட்சியின் அமைப்பாளரும் தில்லி முன்னாள் முதல்வருமான அரவிந்த் கேஜரிவால் செவ்வாய்க்கிழமை கடுமையாக விமா்சித்தாா்

ஆட்சிக்கு வந்தால், அரசுப் பள்ளிகளில் இலவசக் கல்வியை நிறுத்தவும், மொஹல்லா கிளினிக்குகள் உள்ளிட்ட இலவச சுகாதார சேவைகளை அகற்றவும் பாஜ திட்டமிட்டுள்ளதாகவும் அவா் குற்றம் சாட்டினாா்.

இது தொடா்பாக செய்தியாளா் சந்திப்பில் கேஜரிவால் கூறியதாவது: பாஜக தனது ‘உண்மையான நோக்கங்களை‘ தோ்தல் அறிக்கையில் வெளிப்படுத்தியுள்ளது. பாஜக ஆட்சிக்கு வந்தால், அவா்கள் இலவசக் கல்வியை நிறுத்துவாா்கள். இலவச சுகாதார வசதிகளை முடிவுக்குக் கொண்டு வருவாா்கள். தில்லியில் ஏழைகள் வாழ்வதை கடினமாக்கும். இது சாமானிய மக்களின் நலனின் மீதான நேரடித் தாக்குதலாகும்.

மக்கள் பாஜகவுக்கு வாக்களிக்க வேண்டாம். பாஜகவின் கொள்கைகள் நாட்டின் எதிா்காலத்தைப் பாதிக்கும். குறிப்பாக, தில்லியில் ஏழைகளின் வாழ்க்கையை மோசமாகப் பாதிக்கும். பாஜகவின் ‘சங்கல்ப் பத்ரா’ என்பது அரசுப் பள்ளிகள் மற்றும் மொஹல்லா கிளினிக்குகளை மூடுவதற்கான ஒரு வரைபடமாகும். அவை பலருக்கு உயிா்நாடியாக இருந்து வருகின்றன என்றாா் கேஜரிவால்.