அமைச்சா் துரைமுருகன் வழக்கு: வேறு நீதிபதிக்கு மாற்ற தலைமை நீதிபதிக்கு பரிந்துர...
சென்னை மாநகராட்சிக்கு உள்பட்ட 16 சட்டப்பேரவைத் தொகுதிகளில் கூடுதலாக 353 வாக்குச்சாவடிகள் அமைக்கப்படவுள்ளதாக மாநகராட்சி அதிகாரிகள் தெரிவித்தனா்.
வாக்குச்சாவடிகள் மறுசீரமைப்பு தொடா்பான ஆலோசனைக் கூட்டம் ரிப்பன் மாளிகையில் செவ்வாய்க்கிழமை நடைபெற்றது. கூட்டத்துக்கு மாநகராட்சி ஆணையரும், தோ்தல் அலுவலருமான ஜெ.குமரகுருபரன் தலைமை வகித்தாா்.
திமுக சாா்பில் வழக்குரைஞா் சந்துரு, அதிமுக சாா்பில் முன்னாள் அமைச்சா் டி.ஜெயக்குமாா், பாஜக சாா்பில் மாநில செயலா் கராத்தே ஆா்.தியாகராஜன், காங்கிரஸ் சாா்பில் நவாஸ் உள்ளிட்டோா் கலந்துகொண்டனா்.
கூட்டத்தில் அதிகாரிகள் கூறியதாவது:
சென்னை பெருநகர மாநகராட்சிக்குள்பட்ட 16 சட்டப்பேரவைத் தொகுதிகள் உள்ளன. அவற்றில் மொத்தம் 40,15,878 வாக்காளா்கள் உள்ளனா். தோ்தல் ஆணைய விதிமுறைப்படி 1,200 வாக்காளா்களுக்கு ஒரு வாக்குச்சாவடி என இருக்க வேண்டும். தற்போது சென்னை மாநகராட்சியில் 3,718 வாக்குச்சாவடிகள் உள்ளன. அவற்றில் கூடுதலாக வாக்காளா்கள் உள்ள வாக்குச்சாவடிகள் பிரிக்கப்படவுள்ளன. அதன்படி, புதிதாக 353 வாக்குச்சாவடிகள் உருவாக்கப்படவுள்ளன. மறுசீரமைப்புக்குப் பிறகு சென்னை மாநகராட்சியில் 4,071 வாக்குச்சாவடிகள் இருக்கும் என அதிகாரிகள் தெரிவித்தனா்.
கூட்டத்துக்குப் பிறகு அதிமுக முன்னாள் அமைச்சா் டி.ஜெயக்குமாா் கூறியதாவது:
வாக்காளா் மறுசீரமைப்புக்கு முன்பாக தொகுதிகளில் வாக்குச்சாவடிகளுக்கு இடையேயான தொலைவு அரசியல் கட்சியினா் அறியும் வகையில் விவரங்களைத் தெரிவிக்கவேண்டும். திரு.வி.க.நகா், ராயபுரம் மண்டலங்களில் வாக்காளா் பட்டியலில் குளறுபடிகள் உள்ளன. ராயபுரத்தில் 10 வாக்குச்சாவடிகளில் 507 இறந்தவா்கள் பெயா்கள் பட்டியலில் இடம் பெற்றுள்ளன. மேலும், 989 பேரின் வீட்டு முகவரிகளே இல்லாத நிலையில் வாக்காளா் பட்டியலில் இடம் பெற்றுள்ளனா். எனவே, வெளிப்படைத் தன்மையுடன் வாக்காளா்கள் பட்டியலில் பெயா் சோ்த்தல், நீக்கல் நடைபெறவேண்டும் என்றாா்.
கராத்தே தியாகராஜன்: சென்னை மாநகராட்சியில் வாக்காளா் பட்டியல் குளறுபடி தொடா்கதையாகி வருகிறது. வாக்குச்சாவடிகள் பிரிக்கப்படும்போது ஒரே குடியிருப்பில் வசிப்போா் வெவ்வேறு வாக்குச் சாவடிகளில் வாக்களிப்பது போன்ற நிலை இருக்கக் கூடாது.
வாக்காளா் பட்டியல் தயாரிப்பில் அமைச்சா்களது தலையீடு இருப்பது சரியல்ல. ஆகவே, வெளிப்படைத் தன்மையுடன் வாக்காளா் பட்டியலை வெளியிட்ட பிறகே வாக்குச்சாவடி மறுசீரமைப்பு நடவடிக்கை மேற்கொள்ளவேண்டும் என்றாா்.
முன்னதாக, கூட்டத்தின்போது கட்சி வாரியாக பிரதிநிதிகளை அனுமதிப்பது தொடா்பாகவும், பிகாா் வாக்காளா் பட்டியல் குளறுபடி குறித்து பேசியபோதும் கட்சியினரிடையே வாக்குவாதம் ஏற்பட்டது.
மாா்க்சிஸ்ட் கம்யூனிஸ்ட் கட்சி நிா்வாகி முகமது ஆஸ்கா் ஐ. உசேன் பேசுகையில், தனது பெயா் வாக்காளா் பட்டியலில் இருந்து நீக்கப்பட்டது குறித்து பலமுறை தெரிவித்தும் சரிசெய்யவில்லை. தனது சகோதரா் இறந்து பல ஆண்டுகளாகியும் வாக்காளா் பட்டியலில் அவரது பெயா் இடம் பெற்றுள்ளது என்றும் தெரிவித்தாா்.
