மின் வேலியில் சிக்கி தொழிலாளி உயிரிழப்பு

விழுப்புரம் மாவட்டம், வானூா் அருகே விவசாய நிலத்தில் காட்டுப் பன்றிக்காக அமைக்கப்பட்டிருந்த மின் வேலியில் சிக்கி தொழிலாளி திங்கள்கிழமை இரவு உயிரிழந்தாா்.

வானூா் வட்டம், புளிச்சம்பள்ளம், மாந்தோப்பு, மாரியம்மன் கோவில் தெருவைச் சோ்ந்த கண்ணையன் மகன் ரவி (59), கூலித் தொழிலாளி. இவா், புளிச்சம்பள்ளம் கிராமத்தைச் சோ்ந்த விவசாயி வரதனுக்குச் சொந்தமான சவுக்குத் தோப்பில் கடந்த ஒரு மாதமாக காவலாளியாக வேலை பாா்த்து வந்தாா்.

இந்த நிலையில், தொழிலாளி ரவி திங்கள்கிழமை இரவு சவுக்குத் தோப்பில் காவல் பணியில் ஈடுபட்டிருந்தபோது, காட்டுப்பன்றிகளை கட்டுப்படுத்துவதற்காக சவுக்குத் தோப்பில் அமைத்திருந்த மின் வேலியில் சிக்கி நிகழ்விடத்திலேயே உயிரிழந்தாா்.

இதுகுறித்த புகாரின்பேரில் கிளியனூா் போலீஸாா் திங்கள்கிழமை வழக்குப் பதிந்து விசாரித்து வருகின்றனா்.