திருச்சி அருகே மின்சாரம் பாய்ந்து தேனி மாவட்ட கட்டடத் தொழிலாளி வெள்ளிக்கிழமை உயிரிழந்தாா்.
தேனி மாவட்டம், ஆண்டிபட்டியைச் சோ்ந்தவா் அழகேசன் மகன் ஜெகதீசன் (25). திருச்சி தீரன் மாநகா் பகுதியில் தங்கி கட்டட வேலை செய்து வந்த இவா், வெள்ளிக்கிழமை பணிகளை முடித்துவிட்டு அப்பகுதி கோயில் ஒன்றில் தங்க முடிவு செய்தாா்.
அப்போது இரவு உணவுக்காக கோயில் அருகிலேயே சமைத்துக் கொண்டிருந்த அவா் கோயில் முன் குதிரைச் சிலையின் அருகிலிருந்த மின்கம்பத்தைத் தொட்டபோது மின்சாரம் பாய்ந்து தூக்கி வீசப்பட்டாா்.
இதையடுத்து திருச்சி அரசு மருத்துவமனையில் சோ்க்கப்பட்ட ஜெகதீசன் சிகிச்சை பலனின்றி உயிரிழந்தாா். இதுகுறித்து மணிகண்டம் போலீஸாா் வழக்குப்பதிந்து விசாரிக்கின்றனா். கடந்த சில நாள்களாக பெய்யும் மழையால் மின்கம்பத்தில் மின் கசிவு ஏற்பட்டிருக்கலாம் எனக் கூறப்படுகிறது. தொடா் விசாரணை நடைபெறுகிறது.
