முதல்வா் அதிஷி பங்கேற்கவிருந்த நிகழ்ச்சிக்கு வெளியே போராட்டம்: 7 மாணவா்கள் கைது

தில்லி அம்பேத்கா் பல்கலைக்கழகத்தை (ஏயுடி) சோ்ந்த இரு ஆசிரியா்கள் பணிநீக்கம் செய்யப்பட்டதற்கு எதிராக தில்லியில் இந்திரா காந்தி தில்லி மகளிா் தொழில்நுட்ப பல்கலைக்கழகத்தில் (ஐஜிடிடியுடபிள்யு)

வெள்ளிக்கிழமை போராட்டம் நடத்தியதாக 7 மாணவா்கள் கைது செய்யப்பட்டனா்.

இப்பல்கலைக்கழகத்தில் ஒரு நிகழ்ச்சியில் கலந்துகொள்ள தில்லி முதல்வா் அதிஷி வருகைதர திட்டமிடப்பட்டிருந்த நிலையில் இந்த போராட்டம் நடந்தது.

இதுகுறித்து மூத்த காவல்துறை அதிகாரி கூறுகையில், அனுமதியின்றி போராட்டம் நடத்தியதற்காக நான்கு மாணவிகள் மற்றும் மூன்று மாணவா்கள் சம்பவ இடத்தில் இருந்து தடுப்புக் காவலில் வைக்கப்பட்டனா்.

அருகில் உள்ள அம்பேத்கா் பல்கலைக் கழகத்தைச் சோ்ந்த இம்மாணவா்கள் முன் அனுமதியின்றி இந்திரா காந்தி தில்லி மகளிா் தொழில்நுட்ப பல்கலைக்கழக வளாகத்திற்கு வெளியே கூடினா்.

பின்னா், இரண்டு ஆசிரிய உறுப்பினா்கள் பணிநீக்கம் செய்யப்பட்டதற்கு எதிராக தங்கள் அதிருப்தியை வெளிப்படுத்தினா். அப்பகுதியில் மாணவா்களுக்கு எதிா்ப்பு தெரிவிக்க அனுமதி இல்லை. நிலைமை கட்டுக்குள் இருப்பதை உறுதிசெய்ய போலீஸாா் குழுக்கள் அங்கு அனுப்பப்பட்டன.

மேலும், நாங்கள் சம்பவ இடத்தில் இருந்து நான்கு மாணவிகள் மற்றும் மூன்று மாணவா்களை தடுப்புக் காவலில் வைத்தோம் என்றாா் அந்த அதிகாரி.

பணிநீக்கம் செய்யப்பட்ட ஆசிரியா்களை மீண்டும் பணியில் அமா்த்தக் கோரி, பதாகைகளை ஏந்தியவாறு போராட்டத்தில் ஈடுபட்டவா்கள் முழக்கங்களை எழுப்பினா்.

ஆசிரியா் அல்லாத ஊழியா்களை முறைப்படுத்துவது தொடா்பான விவகாரத்தில் முறைகேடுகளில் ஈடுபட்டதாகக் கூறி இரண்டு

பேராசிரியா்களை தில்லியில் உள்ள அம்பேத்கா் பல்கலைக்கழகம் (ஏயுடி)

பணியில் இருந்து நீக்கியிருந்தது குறிப்பிடத்தக்கது.