முதுநிலை மருத்துவப் படிப்புகளில் வசிப்பிட அடிப்படையில் இடஒதுக்கீடு கூடாது: உச்சநீதிமன்றம் தீா்ப்பு

முதுநிலை மருத்துவப் படிப்புகளில் வசிப்பிட அடிப்படையில் இடஒதுக்கீடு அளிப்பது அரசமைப்புச் சட்டத்துக்கு எதிரானது என்று உச்சநீதிமன்றம் புதன்கிழமை தீா்ப்பளித்தது.

கடந்த 2019-ஆம் ஆண்டு பஞ்சாப் மற்றும் ஹரியாணாவின் தலைநகரான சண்டீகா் அரசு மருத்துவக் கல்லூரியில், முதுநிலை மருத்துவப் படிப்புகளில் வசிப்பிட அடிப்படையில் இடஒதுக்கீடு அளிக்கப்பட்டதை ரத்து செய்து மாநில உயா்நீதிமன்றம் உத்தரவிட்டது. இந்த உத்தரவுக்கு எதிராக உச்சநீதிமன்றத்தில் மேல்முறையீட்டு மனுக்கள் தாக்கல் செய்ய்யப்பட்டன.

இந்த மனுக்களை விசாரித்த உச்சநீதிமன்றத்தின் இரு நீதிபதிகள் அமா்வு, ‘முதுநிலை மருத்துவப் படிப்புகளுக்கு மாநில ஒதுக்கீட்டு இடங்களில் வசிப்பிட அடிப்படையில் இடஒதுக்கீடு அளிப்பது அரசமைப்புச் சட்டப்படி செல்லுபடியாகுமா? அத்தகைய இடஒதுக்கீட்டை அனுமதிக்க முடியுமா?’ உள்ளிட்ட கேள்விகளை எழுப்பி, அதிக நீதிபதிகள் கொண்ட அமா்வுக்கு மனுக்களை பரிந்துரைத்தது.

இந்த மனுக்கள் மீது உச்சநீதிமன்ற நீதிபதிகள் ரிஷிகேஷ் ராய், சுதான்ஷு தூலியா, எஸ்.வி.என்.பாட்டீ ஆகியோா் அடங்கிய அமா்வு புதன்கிழமை தீா்ப்பளித்தது.

அப்போது நீதிபதிகள் அமா்வு தெரிவித்ததாவது: நாம் அனைவரும் இந்தியாவில் வசித்து வருகிறோம். ஒரு நாட்டின் குடிமக்கள் மற்றும் குடியிருப்புவாசிகள் என்ற பொதுவான பிணைப்பு, இந்தியாவில் எங்கு வேண்டுமானாலும் நமது வசிப்பிடத்தை தோ்வு செய்யும் உரிமையை நமக்கு அளிக்கிறது. அந்தப் பிணைப்பு இந்தியாவின் எந்தப் பகுதியிலும் நாம் வா்த்தகம் அல்லது தொழில் செய்வதற்கான உரிமையையும், இந்தியா முழுவதும் உள்ள கல்வி நிறுவனங்களில் சோ்க்கை பெற்று படிப்பதற்கான உரிமையையும் நமக்கு அளிக்கிறது.

இளநிலை படிப்புக்கு மட்டும்...: ஒரு மாநிலத்தில் வசிப்போருக்கு மருத்துவக் கல்லூரிகள் உள்ளிட்ட கல்வி நிறுவனங்களில், இடஒதுக்கீட்டின் பலனை இளநிலை மருத்துவப் படிப்புகளில் மட்டும் குறிப்பிட்ட அளவுக்கு வழங்கலாம். ஆனால், முதுநிலை மருத்துவப் படிப்பில் வசிப்பிட அடிப்படையில் இடஒதுக்கீடு அளிப்பது அரசமைப்புச் சட்டப் பிரிவு 14-க்கு எதிரானது.

தகுதியைக் கொண்டே நிரப்ப வேண்டும்: மாநில ஒதுக்கீட்டில் முதுநிலை மருத்துவப் படிப்புகளுக்கு வசிப்பிட அடிப்படையில் இடஒதுக்கீடு அளிப்பதை அரசைமைப்புச் சட்டப்படி அனுமதிக்க முடியாது. அத்தகைய இடஒதுக்கீட்டை அனுமதிப்பது பல மாணவா்களின் அடிப்படை உரிமைகளைப் பறிப்பதாகும்.

எனவே, மாநில ஒதுக்கீட்டில் வரும் முதுநிலை மருத்துவப் படிப்பு இடங்களை, நீட் தோ்வு தோ்ச்சியை தகுதியாகக் கொண்டே நிரப்ப வேண்டும் என்று தீா்ப்பளித்தது.

முந்தைய இடஒதுக்கீட்டுக்குப் பொருந்தாது: எனினும் இந்தத் தீா்ப்பு முதுநிலை மருத்துவப் படிப்புகளில் வசிப்பிட அடிப்படையில் ஏற்கெனவே அளிக்கப்பட்ட இடஒதுக்கீட்டுக்குப் பொருந்தாது, அந்த இடஒதுக்கீட்டை தற்போதைய தீா்ப்புப் பாதிக்காது என்றும் நீதிபதிகள் அமா்வு தெரிவித்தது.

தென்மாநிலங்களுக்குப் பாதிப்பு?: தற்போதைய நடைமுறையின்படி, மொத்த முதுநிலை மருத்துவப் படிப்பு இடங்களில் 50 சதவீத இடங்கள் அனைத்து இந்திய ஒதுக்கீட்டுக்கு வழங்கப்படுகிறது. எஞ்சிய இடங்கள் அந்தந்த மாநிலங்களில் வசிக்கும் மாணவா்களுக்காக ஒதுக்கப்படுகிறது.

இந்நிலையில், அந்தந்த மாநிலங்களில் வசிக்கும் மாணவா்களுக்காக ஒதுக்கப்படும் இடங்கள், அந்த மாநிலங்களில் வசிக்காத பிற மாநில மாணவா்களுக்குக் கிடைக்க உச்சநீதிமன்றத் தீா்ப்பு வழிவகை செய்துள்ளது. இதனால் அந்தந்த மாநிலங்களில் வசிக்கும் மாணவா்கள் பாதிக்கப்படுவதுடன் அந்த இடங்களுக்கான போட்டியும் அதிகரிக்கும்.

உச்சநீதிமன்றத்தின் இந்தத் தீா்ப்பு தென் மாநிலங்களைப் பெரிதும் பாதிக்கும் என்று கருதப்படுகிறது.