முருகன் கோயில் திருப்படித் திருவிழா பணிகள் ஆய்வு

திருத்தணி முருகன் கோயில் திருப்படித் திருவிழாவையொட்டி, மலைப்பாதை மற்றும் வாகனங்கள் நிறுத்தம் ஆகிய இடங்களில் அறங்காவலா் குழுத் தலைவா் சு.ஸ்ரீதரன் நேரில் சென்று ஆய்வு செய்தாா்.

திருத்தணி முருகன் கோயிலில் வரும் 31-ஆம் தேதி படித்திருவிழாவும், ஜன. 1-ஆம் தேதி புத்தாண்டு சிறப்பு தரிசனம் நடைபெறுகிறது. இந்த விழாவுக்கு, தமிழகம் உள்பட அண்டை மாநிலங்களில் இருந்து லட்சக்கணக்கான பக்தா்கள் முருகன் கோயிலுக்கு வந்து சுவாமி தரிசனம் செய்வா். இதற்காக கோயில் நிா்வாகம் பக்தா்களுக்குத் தேவையான அடிப்படை வசதிகளை மலைக்கோயில் மற்றும் தேவஸ்தான குடில்களில் செய்து வருகிறது.

மேலும், வாகனங்களில் வரும் பக்தா்களுக்கு வாகன நிறுத்துமிடம், அங்கு அடிப்படை வசதிகள் மற்றும் பக்தா்கள் பாதுகாப்புக்கு கண்காணிப்பு கேமராக்கள், கூடுதலாக அமைக்கப்பட்டு வருகின்றன. இந்த நிலையில், வியாழக்கிழமை திருத்தணி முருகன் கோயில் அறங்காவலா் குழுத் தலைவா் சு.ஸ்ரீதரன், இணை ஆணையா் க.ரமணி, அறங்காவலா்கள் கோ.மோகனன், வி.சுரேஷ்பாபு, மு.நாகன் ஆகியோா் மலைக்கோயில், மலைப் பாதை மற்றும் வாகனங்கள் நிறுத்துமிடம் ஆகிய இடங்களில் நேரில் சென்று ஆய்வு செய்தனா்.

மேலும், மலையடிவாரத்தில் வாகனங்கள் நிறுத்துமிடம், அதற்கு செல்வதற்கு வழி போன்ற இடங்களையும் ஆய்வு செய்தனா். இந்த ஆய்வின்போது, கோயில் உதவி பொறியாளா்கள் வேல்முருகன், நேதாஜி உள்பட கோயில் அலுவலா்கள் உடனிருந்தனா்.