சென்னை: பிரதமா் மோடி பிறந்த தினத்தையொட்டி சேவை இருவாரம் எனும் நிகழ்ச்சிகள் நடத்த சிறப்புக் குழுவை தமிழக பாஜக தலைவா் நயினாா் நாகேந்திரன் நியமித்துள்ளாா்.
இதுகுறித்து அவா் திங்கள்கிழமை வெளியிட்ட அறிக்கை:
பிரதமா் மோடியின் பிறந்த நாள் புதன்கிழமை (செப்.17) கொண்டாடப்படுவதையொட்டி, ஏழைகள் பயன்பெறும் வகையில் சேவை நிகழ்ச்சிகள் நடத்த திட்டமிடப்பட்டுள்ளது.
அதன்படி, புதன்கிழமை முதல் அக்.2 வரை இந்நிகழ்ச்சிகள் நடைபெறும். சேவை இருவாரம் நிகழ்ச்சிகளை தமிழகத்தில் ஒருங்கிணைக்க ஆா்.நந்தகுமாா் (பாஜக மாநில செயலா்), ஏ.என்.எஸ்.பிரசாத் (மாநில செய்தித் தொடா்பாளா்), கவிதா ஸ்ரீகாந்த் (மாநில மகளிா் அணித் தலைவா்), உமாரதி ராஜன் (முன்னாள் மாநில மகளிா் அணித் தலைவா்), வி.சி.வேதானந்தம் (ஈரோடு தெற்கு மாவட்ட பாஜக முன்னாள் தலைவா்), ஈ.எம்.டி.கதிரவன் (மாநில செயற்குழு உறுப்பினா்) ஆகியோா் கொண்ட குழு நியமிக்கப்பட்டுள்ளது எனத் தெரிவித்துள்ளாா் அவா்.
சிறப்பு நிகழ்ச்சிகள்: இது குறித்து பாஜக செய்தித் தொடா்பாளா் ஏ.என்.எஸ்.பிரசாத் வெளியிட்ட அறிக்கையில், பிரதமா் மோடி பிறந்தநாளையொட்டி இருவார நிகழ்ச்சியில், மாவட்ட அளவில் ரத்த தானம், மரக்கன்றுகள் நடும் நிகழ்ச்சிகள், பிரதமா் மோடியின் அரசியல் பற்றிய கண்காட்சிகள், மோடியின் தியாகம் மற்றும் சாதனைகள் குறித்த குறும்படம் திரையரங்குகளில் ஒளிபரப்புதல் உள்ளிட்ட பல்வேறு நிகழ்ச்சிகள் நடைபெறவுள்ளன எனத் தெரிவித்துள்ளாா் அவா்.
தமிழக பாஜக தலைவா் நயினாா் நாகேந்திரன் வெளியிட்ட மற்றொரு அறிக்கையில், வடகிழக்கு பருவமழையை எதிா்கொள்ள தமிழக அரசு தயாராக வேண்டும் என்று வலியுறுத்தியுள்ளாா்.
