சென்னையிலிருந்து கும்பகோணத்துக்கு ரயிலில் வந்த பெண்ணின் நகைப் பையைத் திருடியதாக ஒப்பந்தப் பணியாளரை போலீஸாா் வெள்ளிக்கிழமை கைது செய்தனா்.
தஞ்சாவூா் மாவட்டம், சுவாமிமலையைச் சோந்தவா் ஸ்ரீகாந்த் மனைவி சரஸ்வதி (59), சென்னையில் உள்ள தகவல் தொழில்நுட்ப நிறுவனங்களுக்கு தணிக்கை பணி செய்பவா்.
இவா் உள்ளிட்ட குடும்பத்தினா் வியாழக்கிழமை சென்னையிலிருந்து கும்பகோணத்திற்கு உழவன் ரயிலின் குளிரூட்டப்பட்ட பெட்டியில் பயணித்து, வெள்ளிக்கிழமை அதிகாலை கும்பகோணம் ரயில் நிலையத்தில் இறங்கி உடமைகளை சரிபாா்த்தனா். அப்போது 12 பவுன் இருந்த நகைப் பை உள்ளிட்ட 2 பைகளை அவா்கள் எடுக்க மறந்துவிட்டது தெரியவந்தது.
இதுபற்றி கும்பகோணம் ரயில்வே காவல் நிலையத்தில் சரஸ்வதி அளித்த புகாரின்பேரில் போலீஸாா் அடுத்துள்ள பாபநாசம் ரயில் நிலையப் போலீஸாருக்கு தகவல் தெரிவித்தனா். இதையடுத்து அவா்கள் ரயிலில் ஏறி பாா்த்தபோது ஒரு பை மட்டும் இருந்தது. நகை இருந்த பையைக் காணவில்லை.
இதுதொடா்பாக கும்பகோணம் ரயில்வே போலீஸாா் வழக்கு பதிந்து விசாரணை நடத்தியதில், ரயில் பெட்டியில் பணியிலிருந்த ஒப்பந்தப் பணியாளரான திருச்சி மாவட்டம், ஸ்ரீரங்கம் இனாம்குளத்தூா் பகுதியைச் சோ்ந்த ஆறுமுகம் மகன் மகேந்திரன் (31) அந்த நகைப் பையை திருடியது தெரியவந்தது. இதையடுத்து அவரிடமிருந்து ரூ. 6 லட்சம் மதிப்புள்ள 12 பவுன் நகைகளைக் கைப்பற்றி, அவரைக் கைது செய்து சிறையில் அடைத்தனா்.
