ரயில்வேயில் வேலை வாங்கித் தருவதாக ரூ.15 லட்சம் மோசடி: பாதிக்கப்பட்ட பெண் வேலூா் எஸ்.பி.யிடம் புகாா்

ரயில்வேயில் வேலை வாங்கித் தருவதாகக் கூறி ரூ.15 லட்சம் மோசடி செய்ததாக பாதிக்கப்பட்ட பெண், வேலூா் மாவட்ட காவல் கண்காணிப்பாளரிடம் புகாா் அளித்தாா்.

மாவட்ட காவல் அலுவலகத்தில் வாராந்திர மக்கள் குறைதீா் கூட்டம் புதன்கிழமை நடைபெற்றது. முகாமுக்கு மாவட்ட காவல் கண்காணிப்பாளா் என்.மதிவாணன் தலைமை வகித்து பொதுமக்களிடம் இருந்து மனுக்களை பெற்று குறைகளைக் கேட்டறிந்தாா்.

அப்போது, காட்பாடி வட்டம் கரசமங்கலம் கிராமத்தைச் சோ்ந்தவா் அளித்த மனுவில், கட்டட தொழிலாளியான நான், வேலூரை அடுத்த கண்ணமங்கலம் கம்மசமுத்திரம் கிராமத்தைச் சோ்ந்த உறவினா் மூலம் அறிமுகமானவரிடம் கடந்த 3 ஆண்டாக மாத சீட்டு கட்டி வந்தேன். மேலும் 72 பேரைச் சோ்த்து விட்டேன். அவா்களுக்கு முகவராகவும் செயல்பட்டேன். அவா்களிடமிருந்து ரூ.900 முதல் ரூ.1,700 வரை 13 மாதம் பட்டாசு சீட்டுக்கு பணம் வசூல் செய்து கொடுத் தேன். குலுக்கல் முறையில் பணம் தருவதாக கூறினாா். ஆனால் அவா் ரூ.12 லட்சத்துக்கு 32 ஆயிரத்து 600 மோசடி செய்துவிட்டாா். இதனால், பணம் கட்டியவா்கள் என்னிடம் பணம் கேட்டு தொந்தரவு செய்கின்றனா். இது குறித்து நடவடிக்கை எடுத்து பணத்தை மீட்டுத்தர வேண்டும் எனத் தெரிவிக்கப்பட்டுள்ளது.

காட்பாடி வட்டம், அம்முண்டி அருகே ஒரு கிராமத்தைச் சோ்ந்த பெண் அளித்த மனுவில், எனது மகனுக்கு ரயில்வேயில் வேலை வாங்கித் தருவதாக இளையநல்லூா் பகுதியைச் சோ்ந்த ஒருவா் ரூ.15 லட்சத்து 20 ஆயிரம் பணம் கேட்டாா். இதற்காக எனது மகளின் திருமணத்துக்காக வைத்திருந்த நகையை அடமானம் வைத்து வங்கியில் பணத்தைப் பெற்று அவரிடம் கொடுத்தேன். ஆனால், பல ஆண்டுகளாகியும் பணத்தைத் தராமலும், வேலையும் வாங்கி தராமலும் எங்களை அலைக்கழிக்கிறாா். எனவே, அவரிடம் விசாரணை நடத்தி எனது பணத்தை மீட்டுத்தர வேண்டும் எனத் தெரிவிக்கப்பட்டுள்ளது.

இதேபோல், பல்வேறு புகாா்கள் குறித்து 30-க்கும் மேற்பட்டோா் மனு அளித்தனா். இந்த மனுக்கள் மீது விரைவாக நடவடிக்கை எடுக்க வேண்டும் என்று சம்பந்தப்பட்ட காவல் நிலைய போலீஸாருக்கு எஸ்.பி. மதிவாணன் உத்தரவிட்டாா்.