லஞ்சம்: காவல் உதவி ஆய்வாளா் மீது வழக்கு

விபத்து வழக்கில் பிணையில் வெளியில் வர சிவகங்கை இளைஞரிடம் ரூ.2 ஆயிரம் லஞ்சம் பெற்றதாக அம்மையநாயக்கனூா் காவல் நிலைய உதவி ஆய்வாளா் மீது ஊழல் தடுப்புப் பிரிவு போலீஸாா் வழக்குப் பதிவு செய்தனா்.

சிவகங்கையைச் சோ்ந்த அரசுப் பேருந்து ஓட்டுநா் சந்திரசேகா் மகன் விஷ்ணுவா்த்தன் (25). இவா் அண்மையில் திண்டுக்கல் மாவட்டம், கொடைரோடு அருகே நான்கு வழிச் சாலையில் காரில் சென்று கொண்டிருந்தபோது, முன்னால் சென்ற லாரி மீது மோதி விபத்து ஏற்பட்டது.

இதுகுறித்து விஷ்ணுவா்த்தன் மீது அம்மையநாக்கனூா் போலீஸாா் வழக்குப் பதிவு செய்தனா். இந்த வழக்கை உதவி ஆய்வாளா் ஷேக் அப்துல்லா விசாரித்த நிலையில், காவல் நிலையப் பிணையில் விஷ்ணுவா்த்தனை விடுவிக்க ரூ.2 ஆயிரம் லஞ்சம் கேட்டாா். அந்தப் பணத்தைக் கொடுத்து வெளியே வந்த விஷ்ணுவா்த்தன், மறுநாள் காரை மீட்பதற்காகச் சென்றாா். அப்போது, காரை விடுவிக்க மேலும் ரூ.3 ஆயிரம் தர வேண்டும் என ஷேக் அப்துல்லா கேட்டாா். இதையடுத்து, திண்டுக்கல் ஊழல் தடுப்புப் பிரிவு காவல் துறையில் சந்திரசேகா் புகாா் அளித்தாா். தொடா்ந்து, ஊழல் தடுப்புப் பிரிவு போலீஸாரின் ஆலேசானையின் படி, ரசாயனப் பொடி தடவிய ரூ.3 ஆயிரத்துடன் அம்மையநாயக்கனூா் காவல் நிலையத்துக்கு விஷ்ணுவா்த்தன் சென்றாா்.

அப்போது, உதவி ஆய்வாளா் ஷேக் அப்துல்லா உடல்நிலைக் குறைபாடு காரணமாக மருத்துவமனையில் அனுமதிக்கப்பட்டாா். இதனால், போலீஸாரிடம் பிடிபடாமல் தப்பினாா். இருப்பினும், ஏற்கெனவே ரூ.2ஆயிரம் லஞ்சம் கொடுத்தபோது பதிவு செய்த விடியோ ஆதாரத்தை சந்திரகேகா் அளித்ததன் அடிப்படையில், உதவி ஆய்வாளா் ஷேக் அப்துல்லா மீது ஊழல் தடுப்பு காவல் துணை கண்காணிப்பாளா் நாகராஜன் தலைமையிலான போலீஸாா் செவ்வாய்க்கிழமை வழக்குப் பதிவு செய்தனா்.