வாணியம்பாடி நகராட்சியில் உள்ள கடைகளில் போதைப் பொருள்கள் விற்பனை தொடா்பாக ஆணையா் முஸ்தபா வியாழக்கிழமை ஆய்வு செய்தாா்.
திருப்பத்தூா் ஆட்சியா் க.சிவசௌந்திரவல்லி உத்தரவின் பேரில் நகராட்சி ஆணையா்
முஸ்தபா தலைமையில் சுகாதார அலுவலா் அப்துல் ரஹிம், சுகாதார ஆய்வாளா் செந்தில் குமாா், களப்பணி அலுவலா் சரவணன் ஆகியோா் கொண்ட குழுவினா் தடை செய்யப்பட்ட போதைப் பொருள்கள் தடுப்பு சோதனையில் ஈடுபட்டனா். அப்போது பேருந்துநிலையம், சி.எல் சாலையில் உள்ள கடைகளில் திடீா் சோதனை மேற்கொண்டனா்.
இதில், சி.எல் சாலை காவாக்கரை பகுதியில் உள்ள ஒரு வீட்டில் சந்தேகத்தின் பேரில் அதிகாரிகள் சோதனை செய்த போது பையில் போதை பாக்கெட்டுகள் இருப்பது தெரியவந்தது. பிறகு அங்கிருந்த 38 பாக்கெட்டுகளை அதிகாரிகள் கைப்பற்றினா். இதுதொடா்பாக வீட்டின் உரிமையாளரிடம் விசாரணை மேற்கொண்டனா்.
தொடா்ந்து கடைகளில் சோதனைகள் நடத்தப்படும் எனவும், போதைப் பொருள்கள் விற்பனை செய்வது கண்டறியப்பட்டால் கடும் நடவடிக்கை எடுக்கப்படும் என அதிகாரிகள் தெரிவித்தனா்.
