விழுப்புரத்தில் சமூக நீதி போராளிகள் மணிமண்டபம், கோவிந்தசாமி நினைவு அரங்கம் திறப்பு

விழுப்புரத்தில் முன்னாள் அமைச்சா் ஏ.கோவிந்தசாமி நினைவு அரங்கம், 21 சமூக நீதி போராளிகளுக்கான மணிமண்டபம் ஆகியவற்றை தமிழக முதல்வா் மு.க.ஸ்டாலின் செவ்வாய்க்கிழமை திறந்து வைத்தாா்.

திராவிட இயக்கத் தலைவா்களில் ஒருவராகத் திகழ்ந்த முன்னாள் அமைச்சா் ஏ.கோவிந்தசாமியின் பெருமையை போற்றும் வகையில், ரூ.4 கோடியில் அவரது திருவுருவச் சிலையுடன் கூடிய நினைவு அரங்கமும், 1987-ஆம் ஆண்டில் நடைபெற்ற இட ஒதுக்கீட்டு போராட்டத்தில் காவல் துறையினரின் துப்பாக்கிச்சூட்டில் பலியான 21 சமூக நீதி போராளிகளின் தியாகத்தை போற்றும் வகையில் ரூ.5.70 கோடியில் மணிமண்டபமும் விழுப்புரம் வழுதரெட்டி பகுதியில் கட்டப்பட்டது.

இதைத் தொடா்ந்து, செவ்வாய்க்கிழமை வழுதரெட்டி பகுதில் நடைபெற்ற அரசு விழாவில் ஏ.கோவிந்தசாமியின் நினைவு அரங்கத்தை திறந்து வைத்த முதல்வா் மு.க.ஸ்டாலின், அவரது திருவுருவச் சிலைக்கு மலா் தூவி மரியாதை செலுத்தினாா். பின்னா், அந்தப் பகுதியில் வைக்கப்பட்டிருந்த பல்வேறு புகைப்படங்களை பாா்வையிட்டாா்.

இதுகுறித்த விவரங்களை ஏ.கோவிந்தசாமியின் மகனும், முன்னாள் எம்.எல்.ஏ.வுமான ஏ.ஜி.சம்பத் முதல்வருக்கு எடுத்துக் கூறினாா். இதைத் தொடா்ந்து, முதல்வா் மு.க.ஸ்டாலினுக்கு விக்கிரவாண்டி எம்.எல்.ஏ. அன்னியூா் அ.சிவா நினைவுப் பரிசை வழங்கினாா்.

இதன் பின்னா், அருகிலுள்ள 21 சமூக நீதி போராளிகளுக்கான மணிமண்டபத்தை திறந்துவைத்த முதல்வா் மு.க.ஸ்டாலின், அவா்களின் சிலைகளுக்கு மலா் தூவி மரியாதை செலுத்தினாா். தொடா்ந்து, சமூக நீதி போராளிகளின் குடும்பங்களைச் சோ்ந்தவா்களுக்கு சால்வை அணிவித்து கெளரவித்தாா்.

விழாவில் அமைச்சா்கள் துரைமுருகன், க.பொன்முடி, மு.பெ.சாமிநாதன், எம்.பி. எஸ்.ஜெகத்ரட்சகன், எம்.எல்.ஏ.க்கள் கே.எஸ்.மஸ்தான், இரா.லட்சுமணன், அன்னியூா் அ.சிவா, பொதுப் பணித் துறை கூடுதல் தலைமைச் செயலா் மங்த்ராம் சா்மா, செய்தி-மக்கள் தொடா்புத் துறை இயக்குநா் இரா.வைத்திநாதன், மாவட்ட ஆட்சியா் சி.பழனி, தெற்கு மாவட்ட திமுக பொறுப்பாளா் பொன்.கெளதமசிகாமணி, முன்னாள் எம்.எல்.ஏ. ஏ.ஜி.சம்பத் குடும்பத்தினா், 21 சமூக நீதி போராளிகள் குடும்பங்களைச் சோ்ந்தவா்கள் பங்கேற்றனா்.