விழுப்புரம்: `ரேட்டிங் செய்தால் பணம்' - சைபர் க்ரைம் கும்பலிடம் ரூ.6.24 லட்சத்தை ஏமாந்த இளம்பெண்

நன்றி: விகடன்இணையதளம்.

விழுப்புரம் மாவட்டத்தைச் சேர்ந்த பெண்ணிடம் இணைய வழியாக ரூ.6.24 லட்சத்தை மோசடி செய்த நபரை, இணைய வழி குற்றப்பிரிவு போலீஸார் தேடி வருகின்றனர்.

பணம் தேவை நாள்தோறும் அதிகரித்துக் கொண்டே வருகிறது. எளிமையாக வீட்டிலிருந்தே பலரும் வேலை தேடி வருகின்றனர். இதனைச் சாதகமாகப் பயன்படுத்திக்கொண்டு மர்ம நபர்கள் சிலர் பண மோசடியில் ஈடுபடுகிறார்கள். நன்கு படித்து வேலையில் இருப்பவர்கள்கூட இது போன்ற மோசடியில் பணத்தை இழக்கிறார்கள். இணையம் வழியாக மக்களை ஏமாற்றி பணம் பறிப்பது இன்றும் தொடர்கதையாக இருந்து வருகிறது.

இது போன்ற சம்பவம் விழுப்புரம் மாவட்டம், திண்டிவனத்தில் அரங்கேறி உள்ளது. விழுப்புரம் மாவட்டம், திண்டிவனத்திற்கு அடுத்த மரக்காணத்தில் வசித்து வருபவர் சசி. இவரைக் கடந்த ஆகஸ்ட் 22-ம் தேதி கைப்பேசியில் அடையாளம் தெரியாத நபர் whatsapp மூலம் தொடர்பு கொண்டு பகுதி நேர வேலையாக சில புகைப்படங்களுக்கு லைக் கொடுத்தால் குறிப்பிட்ட தொகை தரப்படும் எனக் கூறியுள்ளார். இதனை நம்பிய சசி, அந்த நபர் அனுப்பிய புகைப்படத்திற்கு லைக் கொடுத்து ரூபாய் 320 பெற்றாராம். இதைத் தொடர்ந்து செப்டம்பர் 24-ம் தேதி அவரை மீண்டும் தொடர்பு கொண்ட மர்ம நபர், மீண்டும் பகுதி நேர வேலை எனக் கூறி, இணைப்பு லிங்க் ஒன்றினை அனுப்பினர்.

அதனை க்ளிக் செய்த சசி, பயனர் முகவரி, உள்நுழைவுக் குறியீடு ஆகியவற்றை உருவாக்கி அந்த அடையாளம் தெரியாத நபர் கூறியவாறு சிறிய தொகையை முதலீடு செய்து, அதற்குரிய வேலையைச் செய்தாராம். இதையடுத்து ரூபாய் 1,000 முதலீடு செய்து ரூபாய் 1,300 திரும்பப் பெற்றார். இதன் பின்னர் தனது வங்கிக் கணக்கு மற்றும் தனது உறவினரின் வங்கிக் கணக்கு எண்ணுடன் இணைக்கப்பட்ட ஜி.பே வழியாக 13 தவணைகளில் ரூபாய் 6.24 லட்சத்தைச் செலுத்தினார். ஆனால் தனக்குரிய வேலை முடிந்த பிறகும் பணம் ஏதும் திரும்பி வராததால் அதிர்ச்சி அடைந்த சசி, விழுப்புரம் இணையவழி குற்றப்பிரிவு காவல் நிலையத்தில் புகார் அளித்துள்ளார் .

இது தொடர்பாக போலீஸார் வழக்கு பதிவுசெய்து, அந்தப் பெண்ணிடம் மோசடியில் ஈடுபட்ட நபரைத் தேடி வருகின்றனர்.