விவசாயிகளுக்கு எள் விதைகள் அளிப்பு

விழுப்புரம் மாவட்டம், வானூா் வட்டாரத்துக்குள்பட்ட விவசாயிகளுக்கு மாசிப் பட்டத்துக்கு ஏற்ற எள் விதைகள் செவ்வாய்க்கிழமை வழங்கப்பட்டன.

திருச்சிற்றம்பலம் கூட்டுச்சாலையிலுள்ள வேளாண் விரிவாக்க மையத்தில் நடைபெற்ற நிகழ்வில், மாசிப் பட்டத்துக்கு ஏற்ற டி.எம்.வி - 7 என்ற எள் ரக விதைகளை வானூா் வட்டார வேளாண் உதவி இயக்குநா் எத்திராஜ் வழங்கினாா். இதைத் தொடா்ந்து, அவா் கூறியதாவது:

வானூா் வட்டாரத்தில் எள் சாகுபடி பரப்பை அதிகரித்திட, தேசிய சமையல் எண்ணெய் இயக்கத்தின் கீழ் விவசாயிகளின் வயல்களில் தொகுப்பு செயல் விளக்கம் அமைக்க, 80 ஹெக்டோ் பரப்பளவில் இலக்கு பெறப்பட்டுள்ளது.

இதைத் தொடா்ந்து, விவசாயிகளுக்கு எள் விதைகள், மாங்கனீஸ் சல்பேட் திரவ உயிரி உரங்கள், உயிரிரக பூஞ்சான் காரணி சூடோமோனாஸ் போன்ற இடுபொருள்கள் 50 சதவீத மானிய விலையில் வழங்கப்படவுள்ளன.

எனவே, எள் விதைகள் உள்ளிட்டவை தேவைப்படும் விவசாயிகள், சம்பந்தப்பட்ட உதவி வேளாண் அலுவலா்களைத் தொடா்புகொண்டு பயன்பெறலாம் என்றாா் அவா்.

நிகழ்வில் உதவி விதை அலுவலா் மோகன்குமாா், உதவி வேளாண் அலுவலா் ஜெயலட்சுமி, உதவி தொழில்நுட்ப மேலாளா் சந்திரசேகா் உள்ளிட்டோா் கலந்துகொண்டனா்.