வீட்டு அசல் ஆவணங்களை தொலைத்த வங்கி: பெண்ணுக்கு ரூ.4.10 லட்சம் வழங்க உத்தரவு

திருநெல்வேலி மாவட்டத்தைச் சோ்ந்த பெண்ணின் வீட்டு அசல் ஆவணங்களை தொலைத்த வங்கி ரூ.4.10 லட்சம் வழங்க தூத்துக்குடி நுகா்வோா் குறைதீா் ஆணையம் உத்தரவிட்டது.

திருநெல்வேலி மாவட்டம் கல்லிடைக்குறிச்சியைச் சோ்ந்த சண்முகம் மனைவி வேலம்மாள். இவா் கடந்த 2010ஆம் ஆண்டு தனது வீட்டு பத்திரங்களை அங்குள்ள ஒரு தேசியமயமாக்கப்பட்ட வங்கியில் அடமானம் வைத்து ரூ. 3 லட்சத்து 16 ஆயிரம் கடன் பெற்றாராம். கடந்த 2014ஆம் ஆண்டு கடன் தொகை முழுவதையும் கட்டி முடித்துவிட்டாராம்.

பின்னா் அவா் தனது வீட்டின் அசல் ஆவணங்களை கேட்டபோது, அவை தொலைந்துவிட்டதாக வங்கி நிா்வாகத்தினா் தெரிவித்தனராம். இதனால் மனமுடைந்த வேலம்மாள், இது குறித்து திருநெல்வேலி நுகா்வோா் குறைதீா் ஆணையத்தில் வழக்கு தொடா்ந்தாா். இந்த வழக்கு, கடந்த 2022ஆம் ஆண்டு தூத்துக்குடி நுகா்வோா் குறைதீா் ஆணையத்திற்கு மாற்றப்பட்டது. வழக்கை விசாரித்த மாவட்ட நுகா்வோா் குறைதீா் ஆணையத் தலைவா் திருநீலபிரசாத், உறுப்பினா்கள் ஆ.சங்கா், நமச்சிவாயம் ஆகியோா், குற்றம்சாட்டப்பட்ட வங்கி, வேலம்மாளின் வீட்டு அசல் ஆவணங்களை 2 மாதத்திற்குள் வழங்கவேண்டும்; இல்லாவிட்டால், அவருக்கு நஷ்ட ஈடாக ரூ.2 லட்சம், மன உளைச்சலுக்கு ரூ.2 லட்சம், வழக்குச் செலவு ரூ.10 ஆயிரம் என மொத்தம் ரூ.4 லட்சத்து 10 ஆயிரம் வழங்க வேண்டும் என உத்தரவிட்டனா்.