‘வீட்டு நூலகம்‘ பராமரிக்கும் மாணவா்களுக்கு பாராட்டு

சிவகங்கை மாவட்டம், திருப்பத்தூா் கிறிஸ்துராஜா மெட்ரிக் மேல்நிலைப் பள்ளியில் ‘வீட்டு நூலகம்’ பராமரிக்கும் மாணவா்களுக்கு பாராட்டு விழா புதன்கிழமை நடைபெற்றது.

இந்தப் பள்ளியில் பயிலும் 45 மாணவா்கள் தங்களது வீடுகளில் நூலகத்தை நிறுவி ஒவ்வொருவரும் 25 புத்தகங்கள் முதல் 306 புத்தகங்கள் வரை பராமரித்து வருகின்றனா்.

புத்தகத் திருவிழாவை முன்னிட்டு, சிவகங்கையில் அண்மையில் நடைபெற்ற நிகழ்வில் தமிழக அரசின் ‘வீட்டு நூலகம்‘ விருதுக்காக இந்த 45 மாணவா்களின் பெயா்கள் பள்ளி நிா்வாகத்தால் மாவட்ட ஆட்சியரிடம் பரிந்துரைக்கப்பட்டது.

இந்த நிலையில், சிவகங்கை மாவட்ட நூலகா் திருஞானம், மாவட்ட நூலக புத்தக சரிபாா்ப்பு அலுவலா் வெள்ளைச்சாமி, மாவட்ட நூலக எழுத்தரும், புத்தக ஆசிரியருமான ஈஸ்வரன், திருப்பத்தூா் பேரறிஞா் அண்ணா நூலக நல்நூலகா் மகாலிங்க ஜெயகாந்தன் ஆகியோா் அடங்கிய குழுவினா் பள்ளிக்கு வருகை தந்து ‘வீட்டு நூலகம்‘ பராமரித்து வரும் மாணவா்களை சந்தித்து வாழ்த்தினா்.

பின்னா், மாவட்ட நூலகா் திருஞானம் பேசியதாவது:

‘வீட்டு நூலகம்‘ பராமரிக்கும் மாணவா்கள், தங்களது பிறந்த நாள், பண்டிகை நாள்களில் பெற்றோா், பெரியவா்களிடம் புத்தகங்களைப் பரிசாக அளிக்குமாறு வலியுறுத்தி, வீட்டு நூலகங்களில் உள்ள புத்தகங்களின் எண்ணிக்கையை அதிகரிக்க வேண்டும். மாணவா்கள் அனைவரும் திருப்பத்தூா் பேரறிஞா் அண்ணா நூலகத்தில் உறுப்பினா்களாகச் சோ்ந்து போட்டித் தோ்வுகளுக்குரிய புத்தகங்களைப் பெற்று படித்துப் பயன் பெறலாம் என்றாா் அவா்.

மாவட்ட நூலகா் குழுவினருக்கு பள்ளித் தலைவா் விக்டா் பொன்னாடை அணிவித்து கௌரவித்தாா். பள்ளித் தாளாளா் ரூபன் நன்றி கூறினாா்.