உத்தர பிரதேச மாநிலம், திரிவேணி சங்கமத்தில் பாஜக தலைவர்கள் புனித நீராடியதை விமர்சனம் செய்ததன் மூலம் ஹிந்துகளின் நம்பிக்கையை காங்கிரஸ் தலைவர் மல்லிகார்ஜுன கார்கே அவமதித்துள்ளார் என்று மகாராஷ்டிர பாஜக தலைவரும் மாநில வருவாய்த் துறை அமைச்சருமான சந்திரசேகர் பாவன்குலே தெரிவித்தார்.
மத்திய உள்துறை அமைச்சர் அமித் ஷா உள்பட பாஜக தலைவர்கள் பிரயாக்ராஜில் நடைபெறும் மகா கும்பமேளாவில் அண்மையில் புனித நீராடினர். இதுகுறித்து மல்லிகார்ஜுன கார்கே குறிப்பிடுகையில், "கேமராக்களுக்காக பாஜக தலைவர்கள் ஒருவருக்கொருவர் போட்டியிடுகின்றனர்; இவர்கள் சங்கமத்தில் புனித நீராடுவதால் நாட்டின் ஏழ்மை அகன்றுவிடுமா?' என்று கேள்வி எழுப்பியிருந்தார்.
இதற்கு கண்டனம் தெரிவித்து செவ்வாய்க்கிழமை மகாராஷ்டிர பாஜக தலைவர் சந்திரசேகர் பாவன்குலே தனது எக்ஸ் பக்கத்தில் கூறியிருப்பதாவது:
ஒரு குறிப்பிட்ட சமுதாயத்தைத் திருப்திப்படுத்துவதற்காக ஹிந்துகளின் நம்பிக்கை, கலாசாரத்தை காங்கிரஸ் அவமதித்துள்ளது. கார்கேயின் இந்த விமர்சனம் மடமையுடன் ஹிந்துக்கள் மீதான தாக்குதலாகும்.
பக்தியுடனும், நம்பிக்கையுடனும் பல ஆயிரம் ஹிந்துகள் புனித நீராடும் கும்ப மேளாவை கிண்டல் செய்வதன் மூலம் கங்கையின் புனிதத்தையும், கோடிக்கணக்கான ஹிந்துகளின் நம்பிக்கையையும் கார்கே அவமதித்துள்ளார். அவரது இந்த அறிக்கை நகைப்புக்குரியது மட்டுமின்றி மிகவும் கோபமடைய செய்வதாகும். ஹிந்துகள் எப்போதும் சகிப்புத் தன்மையுடன் உள்ளனர். ஆனால் அவர்களின் நம்பிக்கையை கிண்டலடிக்க கார்கேவுக்கு யார் உரிமை அளித்தது? ஹிந்துகளின் வாக்குகளைக் கோரும் காங்கிரஸ், அவர்களின் நம்பிக்கையை அவமதிக்கிறது. ஹிந்துகள் என்ன தவறு செய்தார்கள்? கடந்த 6 தசாப்தங்களாக நாட்டை ஆள காங்கிரஸுக்கு அவர்கள் அனுமதி அளித்ததுதான் தவறா?
பெரும்பான்மை ஹிந்து மக்களின் நம்பிக்கையை கிண்டல் செய்வதன் மூலம் ஒரு குறிப்பிட்ட சமுதாயத்தை காங்கிரஸ் திருப்திப்படுத்த முயல்கிறது. இன்று கும்ப மேளாவை கிண்டல் செய்யும் காங்கிரஸ் கட்சி நாளை ஆட்சிக்கு வந்தால், கும்ப மேளாவை நிறுத்துவார்களோ என்பதே ஹிந்துகளின் கவலையாகும்.
ஹிந்துக்களின் சம்பிரதாயங்களை காங்கிரஸ் தொடர்ந்து விமர்சித்து வந்தால் அதை எவ்வாறு எதிர்கொள்வதென்பதை வாக்காளர்கள் முடிவு செய்வர் என்றார்.
