அறநிலையத் துறை செயல்பாடுகள்: அமைச்சா் சேகா்பாபு ஆய்வு

திருக்கோயில்களில் மேற்கொள்ளப்பட்டு வரும் திருப்பணிகள், ஆக்கிரமிப்பிலிருந்து திருக்கோயில் நிலங்களை மீட்கும் பணிகள் உள்பட இந்து சமய அறநிலையத் துறையின் செயல்பாடுகள் குறித்து துறையின் அமைச்சா் பி.கே.சேகா்பாபு ஆய்வு நடத்தினாா்.

இந்து சமய அறநிலையத் துறை சாா்பில் செயல்படுத்தப்படும் திட்டங்கள், சட்டப்பேரவை அறிவிப்புகள், திருக்கோயில்களில் நடைபெற்று வரும் திருப்பணிகளின் முன்னேற்றம் குறித்த ஆய்வுக் கூட்டம் அமைச்சா் சேகா்பாபு தலைமையில் சென்னையில் புதன்கிழமை நடைபெற்றது.

இந்தக் கூட்டத்தில் ஒருங்கிணைந்த பெருந்திட்ட வரைவின் கீழ் (மாஸ்டா் பிளான்) திருக்கோயில்களில் மேற்கொள்ளப்பட்டு வரும் திருப்பணிகளின் முன்னேற்றம், கிராமப்புற மற்றும் ஆதிதிராவிட மக்கள் வசிக்கும் பகுதி திருக்கோயில் திருப்பணிகள், திருக்கோயில்கள் சாா்பில் நடத்தப்படும் கட்டணமில்லா திருமணங்கள், மூத்த குடிமக்களுக்கான ஆன்மிகப் பயணங்கள், ஒருகால பூஜை திட்ட விரிவாக்கம் மற்றும் அா்ச்சா்களுக்கு வழங்கப்படும் ஊக்கத் தொகை உயா்வு, அா்ச்சகா்கள் மற்றும் பணியாளா்கள் நலன் காக்கும் திட்டங்களின் செயலாக்கம், ஒருவேளை மற்றும் நாள் முழுவதும் அன்னதானத் திட்ட விரிவாக்கம் குறித்து அமைச்சா் சேகா்பாபு ஆய்வு செய்தாா்.

மேலும், நிகழ் நிதியாண்டில் அறிவிக்கப்பட்ட சட்டப்பேரவை அறிவிப்புகளில் நிறைவேற்றப்பட்ட அறிவிப்புகள்; இதர அறிவிப்புகளின் பணி முன்னேற்றம்; பயிற்சிப் பள்ளிகளின் செயல்பாடுகள் மற்றும் மாணவா்களுக்கான ஊக்கத் தொகை உயா்த்தி வழங்குதல்; ஆக்கிரமிப்பிலிருந்து திருக்கோயில் நிலங்களை மீட்கும் பணிகளின் பணி முன்னேற்றம் குறித்தும் விரிவாக ஆய்வு செய்து அறிவுரைகளை வழங்கினாா். இந்தக் கூட்டத்தில் சுற்றுலா, பண்பாடு மற்றும் அறநிலையங்கள் துறை கூடுதல் தலைமைச் செயலா் க.மணிவாசன், ஆணையா் பி.என். ஸ்ரீதா், கூடுதல் ஆணையா்கள், இணை ஆணையா்கள், பொறியாளா்கள் கலந்து கொண்டனா்.