பாம்பு கடித்து உயிரிழந்த சிறுமியின் மலைக் கிராமமான அலக்கட்டுக்கு சாலை அமைக்க மறு முன்மொழிவு அனுப்பப்பட்டுள்ளது என தருமபுரி மாவட்ட ஆட்சியா் கி.சாந்தி தெரிவித்தாா்.
இதுகுறித்து அவா் வெளியிட்ட செய்திக் குறிப்பு:
தருமபுரி மாவட்டம், பென்னாகரம் ஊராட்சி ஒன்றியம், அலக்கட்டு கிராமத்தில் விஷப்பாம்பு கடித்ததில் கஸ்தூரி என்ற சிறுமி வியாழக்கிழமை உயிரிழந்ததாா். இதையடுத்து, அச்சிறுமியின் பெற்றோருக்கு ஆறுதல் தெரிவித்து, அவரது பெற்றோருக்கு மூன்று லட்சம் ரூபாய் முதல்வா் நிவாரண நிதி அறிவித்திருந்தாா். இதையடுத்து, வருவாய்த் துறை அதிகாரிகள், அலக்கட்டு மலைக் கிராமத்துக்கு நேரில் சென்று சிறுமியின் பெற்றோருக்கு வெள்ளிக்கிழமை முதல்வரின் பொது நிவாரண நிதி ரூ. 3 லட்சத்தை வழங்கினா்.
சாலை அமைக்க மறு முன்மொழிவு:
தருமபுரி மாவட்டம், பென்னாகரம் ஊராட்சி ஒன்றியத்துக்கு உள்பட்ட வட்டுவன அள்ளி ஊராட்சியில் வனப்பகுதியில் அமைந்துள்ள ஏரிமலை, அலக்கட்டு குக்கிராமங்களுக்குச் செல்லும் சீங்காடு மலை அடிவாரம் முதல் அலக்கட்டு வழி ஏரிமலை சாலை 9 கி.மீ. நீளம் வனப்பகுதிக்கு சொந்தமான சாலையாகும். இச் சாலை அமைக்க வனத் துறையிடமிருந்து அனுமதி வேண்டி பா்வேஸ் இணையதளத்தில் பதிவேற்றம் செய்யப்பட்டுள்ளது.
இச் சாலையை மத்திய அரசின் மண்டல அதிகாரி கடந்த ஜூலை 18 அன்று பாா்வையிட்டுள்ளாா். அவரது ஆய்வறிக்கையின்படி சீங்காடு முதல் ஏரிமலை செல்லும் 4.50 கி.மீ. நீளம் செல்லும் சாலைக்கு 7.50 மீ. அகலத்திற்கு சாலை அமைக்க அனுமதி தருவதாகவும், அலக்கட்டு குக்கிராமத்தில் 100-க்கும் குறைந்த மக்கள்தொகை இருப்பதால் மீதமுள்ள ஏரிமலை முதல் அலக்கட்டு வரை செல்லும் சாலைக்கு 3 மீ. அகலத்திற்கு மட்டுமே சாலை அமைக்க தர இயலும் என்று தெரிவித்துள்ளாா்.
இந்த ஆய்வறிக்கையின்படி 3 மீட்டா் அகலத்திற்கு பேருந்து மற்றும் சரக்கு வாகனங்கள் செல்லும் சாலை அமைக்க இயலாது. எனவே, மலைவாழ் மக்களின் நலன்கருதி, 7.50 மீ. அகலத்திற்கு சாலை அமைக்க வேண்டி மறு முன்மொழிவு பா்வேஸ் இணையதளத்தில் பதிவேற்றம் செய்யப்பட்டு, தொடா் நடவடிக்கையில் உள்ளது என்றாா்.
