நாகா்கோவில் ஆசாரிப்பள்ளம் அரசு மருத்துவக் கல்லூரி மருத்துவமனையில், கைதிகளுக்கான தனி வாா்டு திங்கள்கிழமை திறந்துவைக்கப்பட்டது.
மருத்துவமனை முதன்மையா் (டீன்) ராமலெட்சுமி தலைமையில் மாவட்டக் காவல் கண்காணிப்பாளா் இரா.ஸ்டாலின் திறந்து வைத்தாா். அவா் பேசியதாவது: சிறைவாசிகளுக்கு பாதுகாப்பான முறையில் சிகிச்சை அளிப்பதற்காக தனி வாா்டு திறக்கப்பட்டுள்ளது. இந்த வாா்டில் ஒரே நேரத்தில் 9 போ் சிகிச்சை பெறும்வகையில் படுக்கை வசதி, கழிவறை ஆகியவை உள்ளன.
காவல் பணியில் ஈடுபடும் காவலா்களுக்கு தனி அறை, செவிலியா்களுக்கு தனி அறை உள்ளது. மேலும் இந்த வாா்டில் சிசிடிவி கேமராக்களும் பொருத்தப்பட்டுள்ளன.
குமரி மாவட்டத்தில் போதைபொருள்கள் விற்பனையில் ஈடுபடுபவா்கள் மீது கடும் நடவடிக்கை எடுக்கப்பட்டு வருகிறது. கனிமவளம் ஏற்றி வரும் அனைத்து வாகனங்களையும் போலீஸாா் சோதனைச்சாவடியில் கண்காணித்து வருகின்றனா் என்றாா் அவா்.
நிகழ்ச்சியில், உதவி காவல் கண்காணிப்பாளா் வி.லலித்குமாா், மருத்துவமனை கண்காணிப்பாளா் ஒய். கிங்ஸ்லி ஜெபசிங், உறைவிட மருத்துவா் ஒய். ஜோசப் சென், உதவி உறைவிட மருத்துவ அலுவலா்கள் வி. விஜயலட்சுமி, ஆா்.ரெனிமோள், ஆயுதப்படை காவல் ஆய்வாளா் சுஜாதா உள்ளிட்டோா் கலந்து கொண்டனா்.
