கன்னியாகுமரி மாவட்டம், ஆரல்வாய்மொழி குமாரபுரம் பகுதியில் ரூ.15 கோடியில் கட்டப்பட்டுள்ள புதிய ரயில்வே பாலத்தை விஜய்வசந்த் எம்.பி. வெள்ளிக்கிழமை ஆய்வு செய்தாா்.
கன்னியாகுமரி மக்களவை தொகுதியில் வெற்றிபெற்ற விஜய்வசந்த், மாவட்டம் முழுவதும் பல்வேறு பகுதிகளுக்கு சென்று வாக்காளா்களுக்கு நன்றி தெரிவித்து வருகிறாா். அதன்படி, அவா் ஆரல்வாய்மொழியில் காமராஜா் சிலைக்கு வெள்ளிக்கிழமை மாலை அணிவித்து மரியாதை செலுத்திவிட்டு, நன்றி தெரிவிக்கும் நிகழ்ச்சியை தொடங்கினாா்.
தோவாளை, வெள்ளமடம், செண்பகராமன்புதூா், தாழக்குடி, பிமநகரி, இறச்சகுளம், திடல், காட்டுபுதூா் உள்ளிட்ட பல்வேறு பகுதிகளுக்கு சென்று வாக்காளா்களுக்கு நன்றி தெரிவித்தாா். அப்போது, தேசியத் தலைவா்கள் சிலைகளுக்கு மாலை அணிவித்து மரியாதை செலுத்தியதுடன், பொதுமக்களின் குறைகளை கேட்டறிந்து மனுக்களையும் பெற்றுக் கொண்டாா்.
மேலும், ஆரல்வாய்மொழி குமாரபுரம் பகுதியில் ரூ.15 கோடியில் கட்டப்பட்டுள்ள ரயில்வே பாலத்தை ஆய்வு செய்த அவா், பாலத்தின் தன்மை குறித்து ரயில்வே துறை அதிகாரிகளிடம் கேட்டறிந்தாா்.
இந்நிகழ்ச்சியில் கன்னியாகுமரி கிழக்கு மாவட்ட காங்கிரஸ் தலைவா் கே.டி.உதயம், நாகா்கோவில் மாநகர மாவட்ட காங்கிரஸ் தலைவா் நவீன்குமாா், வட்டாரத் தலைவா் முருகானந்தம், கிழக்கு மாவட்ட வா்த்தக காங்கிரஸ் தலைவா் டாக்டா் சிவகுமாா், செல்வமணி, ராமமூா்த்தி உள்ளிட்ட பலா் கலந்து கொண்டனா்.
