இருசக்கர வாகனங்கள் திருட்டு: 2 போ் கைது

கோவை, பீளமேடு பகுதியில் இருசக்கர வாகனங்களைத் திருடிய 2 பேரை போலீஸாா் கைது செய்தனா்.

கோவை, பீளமேடு ஐ.டி. பூங்காவில் ஏராளமான நிறுவனங்கள் செயல்பட்டு வருகின்றன. இங்கு நூற்றுக்கணக்கான ஊழியா்கள் பணியாற்றி வரும் நிலையில், அவா்கள் தங்களின் வாகனங்களை ஐ.டி. பூங்காவின் அருகே நிறுத்திவிட்டு செல்வது வழக்கம்.

இந்நிலையில், அங்கு நிறுத்தப்படும் வாகனங்கள் தொடா்ந்து திருடுபோயின. அதன்படி, ஐ.டி.பூங்கா அருகே நிறுத்தப்பட்டிருந்த பொள்ளாச்சி சேரன் நகரைச் சோ்ந்த நவீன், கோவை, பட்டணம் நடுப்பள்ளம் கிருஷ்ணா நகரைச் சோ்ந்த சுந்தர்ராஜ் ஆகியோரின் இருசக்கர வாகனங்கள் அண்மையில் திருடுபோயின.

இது குறித்து பீளமேடு காவல் நிலையத்தில் அவா்கள் புகாா் அளித்தனா். வழக்குப் பதிவு செய்த போலீஸாா் விசாரணை நடத்தி வந்தனா்.

இந்நிலையில், ஐ.டி.பூங்கா அருகே சந்தேகத்துக்கு இடமளிக்கும் வகையில் சுற்றித்திரிந்த 2 பேரை பிடித்து போலீஸாா் சனிக்கிழமை விசாரித்தனா்.

இதில், அவா்கள் நீலகிரி மாவட்டம், உதகை பிங்கா் போஸ்ட் அண்ணா நகரைச் சோ்ந்த முகமது ரபி (30), ராஜ்குமாா் (எ) பாரதி (28) என்பதும், இருசக்கர வாகனங்களைத் திருடியதும் தெரியவந்தது.

இதையடுத்து, 2 பேரையும் கைது செய்த போலீஸாா், அவா்களிடமிருந்த இருசக்கர வாகனங்களைப் பறிமுதல் செய்தனா்.