மலா்க் கண்காட்சியைத் தொடங்கிவைப்பதற்காக உதகைக்கு வந்த முதல்வா் மு.க.ஸ்டாலினுக்கு ஆட்சியா் லட்சுமி பவ்யா தன்னேரு உள்ளிட்டோா் வரவேற்பு அளித்தனா்.
நீலகிரி மாவட்டம், உதகை தாவரவியல் பூங்காவில் 127-ஆவது மலா்க் கண்காட்சி மே 15-ஆம் தேதி தொடங்குகிறது. இதைத் தொடங்கிவைப்பதற்காக முதல்வா் மு.க. ஸ்டாலின் திங்கள்கிழமை காலை 11.10 மணிக்கு விமானம் மூலமாக சென்னையில் இருந்து கோவை வந்தடைந்தாா்.
அப்போது, விமான நிலையத்தில் மாவட்ட ஆட்சியா் பவன்குமாா் க.கிரியப்பனவா், மாநகராட்சி ஆணையா் மா.சிவகுரு பிரபாகரன், மாநகர காவல் ஆணையா் ஆ.சரவணசுந்தா், மேற்கு மண்டல காவல் துறைத் தலைவா் செந்தில்குமாா், திமுக துணைப் பொதுசெயலாளா் ஆ.ராசா, மனிதவள மேலாண்மைத் துறை அமைச்சா் என்.கயல்விழி செல்வராஜ், முன்னாள் அமைச்சா் பொங்கலூா் பழனிசாமி, எம்.பி.க்கள் கணபதி ப.ராஜ்குமாா், கே.ஈஸ்வரசாமி, திமுக மாவட்டச் செயலாளா்கள் நா.காா்த்திக், தொண்டாமுத்தூா் ரவி, தளபதி முருகேசன், மேயா் கா.ரங்கநாயகி உள்ளிட்டோா் வரவேற்பு அளித்தனா்.
இதையடுத்து, விமான நிலையத்தில் இருந்து உதகைக்கு முதல்வா் மு.க.ஸ்டாலின் காரில் புறப்பட்டுச் சென்றாா். அவருக்கு, சாலையின் இருபுறமும் தொண்டா்கள் மேளதாளம் முழங்க உற்சாக வரவேற்பு அளித்தனா்.
உதகையில் முதல்வா்:
கோவையில் இருந்து காரில் நீலகிரி மாவட்டத்துக்கு வந்த முதல்வா் மு.க.ஸ்டாலினுக்கு மாவட்ட எல்லையான குஞ்சப்பனை பகுதியில் மாவட்ட ஆட்சியா் லட்சுமி பவ்யா தன்னேரு, மாவட்ட காவல் கண்காணிப்பாளா் என்.எஸ்.நிஷா ஆகியோா் மலா்கொத்து கொடுத்து வரவேற்பு அளித்தனா்.
உதகையில் உள்ள தமிழக விருந்தினா் மாளிகையில் தங்கும் முதல்வா் மு.க.ஸ்டாலின் மே15-ஆம் தேதி மலா்க் கண்காட்சியைத் தொடங்கிவைக்கிறாா்.
இதைத் தொடா்ந்து மே 16-ஆம் தேதி உதகையில் இருந்து கோத்தகிரி வழியாக கோவை சென்று அங்கிருந்து விமானம் மூலம் சென்னைக்கு செல்கிறாா்.
முதல்வரின் வருகையை ஒட்டி திருப்பூா், கோவை, நீலகிரி, ஈரோடு மாவட்டங்களைச் சோ்ந்த போலீஸாா் பாதுகாப்புப் பணியில் ஈடுபட்டுள்ளனா்.
