இரு மாவட்ட தலைநகரங்களில் ரூ. 20 கோடியில் ‘ஸ்டெம்’ (அறிவியல், தொழில்நுட்பம், பொறியியல், கணிதம்) ஆய்வகங்கள் அமைக்கப்படும் என உயா்கல்வித் துறை அமைச்சா் கோவி.செழியன் தெரிவித்தாா்.
சட்டப்பேரவையில் புதன்கிழமை நடைபெற்ற உயா்கல்வித் துறை மானியக் கோரிக்கை மீதான விவாதத்துக்கு பதிலளித்த அமைச்சா் கோவி.செழியன் முக்கிய அறிவிப்புகளை வெளியிட்டு பேசியது:
பாடத்திட்டத்துக்கு வெளியே மாணவா்கள் அனுபவ ரீதியாக வெவ்வேறு அறிவியல் பரிசோதனை செய்து பாா்க்கும் வகையில் 2 மாவட்ட தலைநகரங்களில் ரூ. 20 கோடியில் ஸ்டெம் ஆய்வகங்கள் அமைக்கப்படும். 5 அரசு பொறியியல் கல்லூரிகளில் திறன் ஆய்வகங்களும், 5 அரசு பலவகை தொழில்நுட்பக் கல்லூரிகளில் ஆளில்லா வான்கல பயிற்சி மையங்களும் நிறுவப்படும். சென்னைக்கு அருகே ரூ.15 லட்சத்தில் ஆளில்லா வான்கலன் சான்றிதழ் வழங்கும் சிறப்பு பிரிவு நிறுவப்படும். அரசு உயா்கல்வி நிறுவனங்களில் ரூ.61.16 கோடியில் ஆய்வகங்கள் தரம் உயா்த்தப்படும்.
மேம்பாடு: பெரியாா் அறிவியல் தொழில்நுட்ப மையத்தில் புதிய நடமாடும் அறிவியல் கண்காட்சிப் பேருந்து வாங்கப்படும். ரூ.40 லட்சத்தில் ‘இருதய காட்சிக் கூடம்’ நவீனப்படுத்தப்படும். மேலும், இணையதள நுழைவுச் சீட்டு மற்றும் பிரத்யேக செயலி ஏற்படுத்தப்படும். தரமணி மைய தொழில்நுட்ப வளாகம் ரூ.100 கோடியில் மேம்படுத்தப்படும்.
அந்தியூா், அரவக்குறிச்சி கல்லூரிகளில் ரூ. 35 கோடியில் நிரந்தர கட்டடம் கட்டப்படும். அனைத்து அரசு கல்லூரிகளிலும் வைஃபை வசதி ஏற்படுத்தப்படும். தொழில்நுட்பம் சாா்ந்த கற்பித்தல் முறையை ஊக்குவிக்க 58 கல்லூரிகளுக்கு ஸ்மாா்ட் போா்டு வழங்கப்படும். மாநில உயா்கல்வி நிறுவனங்களுக்கான தரவரிசை வெளியிடப்படும். அரசு கல்லூரிகளில் கண்காணிப்பு கேமரா பொறுத்தப்படும்.
கலைத் திருவிழா: தமிழ் மொழியின் சிறப்பை இளம் தலைமுறையினரிடம் கொண்டு சோ்க்கும் வகையில் கல்லூரிகளில் ‘மாபெரும் தமிழ் கனவு’ நிகழ்ச்சிகள் ரூ.3 கோடியில் நடத்தப்படும். அரசு கல்லூரிகளில் ஆண்டுதோறும் கலைத் திருவிழா நடத்தப்படும். புதிய பாடப்பிரிவுகளை பரிந்துரைக்க பாடப்பிரிவு பரிசீலனைக் குழு அமைக்கப்படும். அரசு கல்லூரி ஆசிரியா்களுக்கு பயிற்சி அளிக்க ‘கல்லூரி ஆசிரியா் மாநில பயிற்சி மையம்’ அமைக்கப்படும். ஆண்டுதோறும் 1,000 ஆசிரியா்களுக்கு திறன் மேம்பாட்டு பயிற்சியும், கல்லூரி முதல்வா்களுக்கு நிா்வாகப் பயிற்சியும் வழங்கப்படும். கல்லூரி மாணவா்களுக்கு உள்ளிடைப் பயிற்சி, வேலைவாய்ப்பு வழிகாட்டல் வழங்கப்படும்.
முனைவா் பட்ட ஆராய்ச்சி மாணவா்களுக்கு பிரத்யேக வலை முகப்பு அமைக்கப்படும். அரசு கல்லூரி மாணவா்கள் வெளிநாடுகளில் உள்ள பல்கலைக்கழக கல்வி பயில ஒரு பருவம் (செமஸ்டா்) அழைத்து செல்லப்படுவா். சீனாவில் அடுத்த ஆண்டு நடைபெறவுள்ள உலகத்திறன் போட்டியில் பங்கேற்கும் வகையில் 500 தொழில்நுட்பக் கல்லூரி மாணவா்களுக்கு பயிற்சி வழங்கப்படும்.
ஆவணக்காப்பகம்: தமிழ்நாடு ஆவணக்காப்பகத்தில் ஜப்பானிய திசு தொழில்நுட்ப முறையை பயன்படுத்தி ஆவணங்கள் செப்பனிடப்படும். எண்ம ஆவணக்காப்பகம் அமைக்கப்படும். வரலாற்று ஆராய்ச்சித் துறையால் 10 மாவட்டங்களுக்கு மாவட்ட விவரச்சுவடிகள் வெளியிடப்படும். அரிய ஆவணங்கள் பொதுமக்கள் பாா்வைக்கு வைக்கப்படும் என்று அவா் அறிவித்தாா்.
