இளையராஜா பிறந்த நாள்: முதல்வா் ஸ்டாலின், மத்திய இணையமைச்சா் எல்.முருகன் வாழ்த்து

சென்னை: இசையமைப்பாளா் இளையராஜாவின் பிறந்த தினத்தையொட்டி, அவருக்கு முதல்வா் மு.க.ஸ்டாலின், மத்திய இணையமைச்சா் எல்.முருகன், அதிமுக பொதுச்செயலா் எடப்பாடி பழனிசாமி உள்ளிட்ட தலைவா்கள் வாழ்த்து தெரிவித்தனா்.

இசையமைப்பாளா் இளையராஜா தனது பிறந்த நாளை திங்கள்கிழமை சென்னையில் கொண்டாடினாா். இதையொட்டி அவருக்கு வாழ்த்து தெரிவித்து முதல்வா் மு.க.ஸ்டாலின் எக்ஸ் தளத்தில் வெளியிட்ட பதிவு: நாட்டுப்புற இசை, மெல்லிசை, துள்ளலிசை, மரபிசை, தமிழிசை, மேற்கத்திய இசை என அனைத்திலும் கரைகண்டு தமிழா்களின் பெருமைமிகு அடையாளமாகத் திகழும் இசையமைப்பாளா் இளையராஜாவுக்கு என் மனம் நிறைந்த பிறந்தநாள் வாழ்த்துகள்.

அவரது சிம்பொனி இசை தமிழ்நாட்டில் ஒலிக்கவுள்ள ஆகஸ்ட் 2-ஆம் தேதிக்காக கோடிக்கணக்கான ரசிகா்களில் ஒருவனாக காத்திருக்கிறேன். நேற்றும் இன்றும் என்றும் அவரது இசை ராஜாங்கத்தின் ஆட்சிதான்.

மத்திய இணையமைச்சா் எல்.முருகன்: இளையராஜாவின் இசைபோல அவா் நல்ல உடல் ஆரோக்கியமும், மனம் நிறை மகிழ்வும் பெற்று, நீண்ட ஆயுளோடு பல்லாண்டு வாழ, எல்லாம்வல்ல இறைவனிடம் வேண்டுகிறேன்.

எடப்பாடி கே.பழனிசாமி (அதிமுக): தமிழ் இசை ரசிகா்களின் உயிரோடும் உணா்வோடும் கலந்திட்ட இசையின் உச்சமான இசைஞானி இளையராஜாவுக்கு இதயங்கனிந்த பிறந்தநாள் வாழ்த்துகள். ‘அன்னக்கிளி உன்னை தேடுது’ என்று ஆரம்பித்து, ‘தினம் தினமும் உன் நினைப்பு’ வரை தொடரும் அவரது இசை மெட்டுகள், மென்மேலும் தமிழ் மக்களின் உள்ளங்களை வென்றிட வாழ்த்துகிறேன்.

அதேபோல, தமிழக காங்கிரஸ் தலைவா் கு.செல்வப்பெருந்தகை, தமிழக பாஜக தலைவா் நயினாா் நாகேந்திரன், தமாகா தலைவா் ஜி.கே.வாசன், பாமக தலைவா் அன்புமணி ராமதாஸ், விசிக தலைவா் தொல்.திருமாவளவன், தேமுதிக பொதுச்செயலா் பிரேமலதா விஜயகாந்த், அமமுக பொதுச்செயலா் டிடிவி தினகரன் உள்ளிட்ட தலைவா்கள், திரைப்பிரபலங்கள் உள்ளிட்டோா் வாழ்த்து தெரிவித்தனா்.