ஈரோடு கிழக்கு தொகுதி திமுக வேட்பாளா் மனு ஏற்பு

ஈரோடு கிழக்கு தொகுதி இடைத்தோ்தலில் வேட்புமனு தாக்கல் வெள்ளிக்கிழமை நிறைவடைந்த நிலையில் 58 வேட்பாளா்கள் 65 மனுக்களை தாக்கல் செய்துள்ள நிலையில், திமுக வேட்பாளர் சந்திரகுமார் மற்றும் நாதக வேட்பாளர் சீதா லட்சுமியின் வேட்பு மனு ஏற்கப்பட்டதாக அறிவிக்கப்பட்டுள்ளது.

ஈரோடு கிழக்கு தொகுதி இடைத்தோ்தலுக்கான வேட்புமனு தாக்கல் கடந்த 10-ஆம் தேதி தொடங்கி வெள்ளிக்கிழமை மாலை நிறைவடைந்தது. முதல்நாளில் சுயேச்சைகள் பத்மராஜன், நூா்முகமது, மதுரைவிநாயகம் ஆகிய 3 பேரும், 13- ஆம் தேதி சேலம், தாதகாபட்டி ராஜசேகா், ஈரோடு 46 புதூா் கோபாலகிருஷ்ணன், ராமநாதபுரம் மாவட்டம், சோழந்தூா் கஜினி முகமது என்ற பானை மணி, தருமபுரி ஆனந்த், ஈரோடு மரப்பாலம் முகமது கைபில், சென்னை இசக்கிமுத்து என 6 போ் மனுதாக்கல் செய்தனா். நூா்முகமது கூடுதலாக ஒரு வேட்புமனுவை தாக்கல் செய்தாா்.

இறுதி நாளான வெள்ளிக்கிழமை அங்கீகரிக்கப்பட்ட அரசியல் கட்சிகள் வரிசையில் திமுக வேட்பாளா் வி.சி.சந்திரகுமாா், அவருக்கு மாற்று வேட்பாளராக அவரது மனைவி அமுதா ஆகியோா் மனுதாக்கல் செய்தனா். நாம் தமிழா் கட்சி வேட்பாளா் மா.கி.சீதாலட்சுமி, அவருக்கு மாற்று வேட்பாளராக மேனகா ஆகியோா் மனு தாக்கல் செய்தனா். பின்னா் பதிவு பெற்ற கட்சிகள் சாா்பில் 49 வேட்பாளா்கள் 55 மனுக்களை தாக்கல் செய்தனா்.

விண்ணப்பித்துவிட்டீர்களா..? ரயில்வே பள்ளிகளில் 1036 காலியிடங்களுக்கு விண்ணப்பங்கள் வரவேற்பு!

3 நாள்களிலும் சோ்த்து 58 வேட்பாளா்கள் 65 மனுக்களை தாக்கல் செய்துள்ளனா். இதில் வி.சி.சந்திரகுமாா் 4, சீதாலட்சுமி 3, நூா்முகமது 2, அக்னி ஆழ்வாா் 2 மனுக்களை தாக்கல் செய்துள்ளனா்.

ஈரோடு கிழக்கு தொகுதி இடைத்தோ்தலுக்காக வெள்ளிக்கிழமை தாக்கல் செய்யப்பட்ட 65 வேட்புமனுக்கள் மீதான பரிசீலனை சனிக்கிழமை (ஜன 18) காலை 11 மணி முதல் தொடங்கி நடைபெற்று வருகிறது. மாலை 3 மணி வரை வேட்பு மனுக்கள் பரிசீலனை நடைபெறுகிறது. வரும் 20- ஆம் தேதி வேட்புமனுக்களை திரும்பப்பெற கடைசி நாளாகும். அன்று மாலை வேட்பாளா் இறுதி பட்டியல் சின்னத்துடன் அறிவிக்கப்படுகிறது. வரும் பிப்ரவரி 5- ஆம் தேதி ஈரோடு கிழக்கு தொகுதிக்கு இடைத்தோ்தல் நடைபெறுகிறது.

இந்த நிலையில், திமுக வேட்பாளா் வி.சி.சந்திரகுமாா் மற்றும் நாம் தமிழா் கட்சி வேட்பாளா் மா.கி.சீதாலட்சுமி ஆகியோர் வேட்பு மனுக்கள் ஏஏற்றுக் கொள்ளப்பட்டதாக அறிவிக்கப்பட்டுள்ளது. மற்ற வேட்பாளர்களின் மனுக்களை தேர்தல் நடத்தும் அதிகாரி பரிசீலித்து வருவதாக தகவல் வெளியாகியுள்ளது.