"போலீஸ் கண் முன்னாடியே வெட்டி கொன்னுட்டாங்களே..." - பெரம்பலூரை உலுக்கிய படுகொலை சம்பவம்

பெரம்​பலூர் மாவட்டம், வேப்​பந்​தட்டை வட்டம் கை.களத்​தூர் காந்தி நகரைச் சேர்ந்​தவர் மணிகண்​டன்​ (வயது 32). அதே பகுதியைச் சேர்ந்​தவர் தேவேந்​திரன்​ (வயது 30). இருவரும் அந்த பகுதியைச் சேர்ந்த ஒருவர் வைத்திருக்கும் நெல் அறுவடை இயந்​திரத்​தில் ஓட்டுநராகப் பணிபுரிந்து வந்தனர்.

இந்நிலையில், இவர்​களுக்​கிடையே முன்​விரோதம் இருந்து வந்ததாகச் சொல்லப்படுகிறது. அதேபோல், அவர்​களுக்​கிடையே மீண்​டும் தகராறு ஏற்பட்​டது. இதுதொடர்பாக, கை.களத்​தூர் காவல் நிலை​யத்​தில் தேவேந்திரன் மீது மணிகண்டன் புகார் கொடுத்துள்ளார். இதையடுத்து, அந்த காவல் நிலையத்தில் பணியாற்றும் தலைமைக் காவலர் ஸ்ரீதர், ஊர்க்​காவல் படை வீரர் பிரபு ஆகியோர் இரு தரப்​பினரிடையே சமாதானம் செய்ய முடிவு செய்து, மணிகண்டனை அழைத்​துக் கொண்டு, கை.களத்​தூர் காந்தி நகர் பகுதி​யில் உள்ள நெல் அறுவடை இயந்திர உரிமையாளர் அருணின் வயலுக்​குச் சென்​றதாகச் சொல்லப்படுகிறது.

இதைப் பார்த்து ஆத்திரமடைந்த தேவேந்​திரன், போலீ​ஸாருடன் வந்த மணிகண்டனை மறித்து, அவரை அரிவாளால் சரமாரியாக வெட்​டி​யுள்​ளார். இதனால் அதிர்ச்​சி​யடைந்த போலீ​ஸார், தேவேந்​திரனைப் பிடித்து கை.களத்​தூர் காவல் நிலை​யத்​துக்கு அழைத்துச் சென்​றனர். மேலும், பலத்த காயமடைந்த மணிகண்டனை மீட்ட போலீ​ஸார், அவரை மருத்​துவ​மனைக்குச் சிகிச்சைக்காக அனுப்பி வைத்​தனர். ஆனால், வழியிலேயே அவர் உயிரிழந்துவிட்டதாக, அவரைப் பரிசோதனை செய்த மருத்துவர்கள் தெரிவித்தனர்.

இதனால், ஆவேசமான அவரது உறவினர்​கள், 'போலீஸார் கண் முன்னாடியே இப்படி வெட்டிக் கொன்னுட்டாங்களே’ என்று கதறினர். அதோடு, மணிகண்டன் உடலை கை.களத்​தூர் காவல் நிலை​யத்​தின் முன் வைத்து, நீதி கேட்டு மறியலில் ஈடுபட்​டனர்.

அப்போது சிலர் காவல் நிலையம் மீது கல் வீசித் தாக்​கினர். இதில், காவல் நிலை​யத்​தின் ஜன்னல் கண்ணாடிகள் சேதமடைந்தாகச் சொல்லப்படுகிறது. அதோடு, மணிகண்டனைக் கொலை செய்த தேவேந்திரனைத் தங்கள் வசம் ஒப்படைக்கும்படி வலியுறுத்தினர். இதனால், காவல் நிலையம் பூட்​டப்​பட்டு, அங்குப் பாதுகாப்புக்காகக் கூடுதல் போலீ​ஸார் குவிக்​கப்​பட்​டனர். மேலும், இந்த சம்பவம் குறித்துத் தகவலறிந்த திருச்சி சரக டி.ஐ.ஜி வருண்​கு​மார், பெரம்​பலூர் எஸ்.பி. ஆதர்ஷ் பசேரா உள்ளிட்​டோர் அங்குச் சென்று, போராட்​டத்​தில் ஈடுபட்​ட​வர்​களிடம் பேச்சுவார்த்தை நடத்​தினர்.

"சம்பந்தப்பட்டவர் மீது சட்டப்படி நடவடிக்கை எடுக்கிறோம்... கொலை செய்யப்பட்ட மணிகண்டன் வீட்டாருக்கு நிதியுதவி, அரசு வேலை உள்ளிட்டவைக் கிடைக்க வழிவகை செய்கிறோம்" என்று வாக்குறுதி கொடுத்தனர். அதனால், மூன்றரை மணி நேரத்துக்​குப் பிறகு பொது​மக்கள் மறியலைக் கைவிட்டு, அங்கிருந்து கலைந்து சென்​றனர்.

முன்விரோதத்தில் பெரம்பலூர் மாவட்டத்தைச் சேர்ந்த இளைஞர் ஒருவர் படுகொலை செய்யப்பட்டுள்ள சம்பவம், அப்பகுதியில் பரபரப்பை ஏற்படுத்தியிருக்கிறது.