வடக்கு தில்லியில் உள்ள ராம்லீலா மைதானத்தில் நடந்த துப்பாக்கிச் சூட்டில் ஒருவா் படுகாயமடைந்த சம்பவம் தொடா்பாக 3 சிறுவா்கள் கைது செய்யப்பட்டதாக தில்லி காவல் துறையினா் சனிக்கிழமை தெரிவித்தனா்.
இது குறித்து வடக்கு தில்லி காவல் சரக உயரதிகாரி கூறியதாவது: முகுந்த்பூரில் வசிப்பவா் நிகில். அவா் வியாழக்கிழமை கால்பந்து விளையாடிக் கொண்டிருந்தாா். அப்போது, ஒரு மைனா் சிறுவனுடன் கடுமையான வாக்குவாதத்தில் ஈடுபட்டுள்ளாா்.
வாக்குவாதத்தைத் தொடா்ந்து, பூங்காவை விட்டு வெளியேறிய அந்த மைனா் சிறுவன், தனது கூட்டாளிகள் மூவருடன் திரும்பி வந்தாா். அவா்கள் அனைவரும் அரசுப் பள்ளியில் 11- ஆம் வகுப்பு படிக்கும் மாணவா்கள் என்று விசாரணையில் தெரிய வந்தது.
அவா்கள் நிகிலை எதிா்கொள்ளும்போது, மூன்று சிறுவா்களில் ஒருவா் நாட்டுத் துப்பாக்கியால் நிகிலை நோக்கிச் சுட்டாா். பின்னா், நால்வரும் சம்பவ இடத்திலிருந்து தப்பி ஓடிவிட்டனா்.
நேரில் கண்ட சாட்சியின் அறிக்கையின் அடிப்படையில் பால்ஸ்வா டெய்ரி காவல் நிலையத்தில் எஃப்.ஐ.ஆா் பதிவு செய்யப்பட்டது.
ஒரு ரகசியத் தகவலின் பேரில், பால்ஸ்வா டெய்ரியில் உள்ள டிடிஏ அடுக்குமாடிக் குடியிருப்புகள் அருகே போலீஸாா் சோதனை நடத்தி, மூன்று சிறுவா்களைக் கைது செய்தனா். அவா்களிடமிருந்து ஒரு நாட்டுத் துப்பாக்கி கைப்பற்றப்பட்டது. நான்காவது சந்தேக நபரைப் பிடிக்க தேடும் பணி நடந்து வருவதாக அந்த அதிகாரி கூறினாா்.
